79.Those who drag forth

Allāhu búra pẹ̀lú àwọn mọlāika t’ó ń fi ọ̀nà èle gba ẹ̀mí àwọn aláìgbàgbọ́
Ó tún búra pẹ̀lú àwọn mọlāika t’ó ń fi ọ̀nà ẹ̀rọ̀ gba ẹ̀mí àwọn onígbàgbọ́ òdodo
Ó tún búra pẹ̀lú àwọn mọlāika t’ó ń yára gágá níbi àṣẹ Rẹ̀
Ó tún búra pẹ̀lú àwọn mọlāika t’ó máa ṣíwájú ẹ̀mí àwọn onígbàgbọ́ òdodo wọnú Ọgbà Ìdẹ̀ra tààrà
Ó tún búra pẹ̀lú àwọn mọlāika t’ó ń ṣètò ilé ayé
Ní ọjọ́ tí ìfọn àkọ́kọ́ fún òpin ayé máa mi gbogbo ayé tìtì pẹ̀lú ohùn igbe
Ìfọn kejì fún Àjíǹde sì máa tèlé e
Àwọn ọkàn yóò máa gbọ̀n pẹ̀pẹ̀ ní ọjọ́ yẹn
Ojú wọn yó sì wálẹ̀ ní ti ìyẹpẹrẹ
Wọn yóò wí pé: "Ṣé Wọ́n tún máa dá wa padà sí ìbẹ̀rẹ̀ ìṣẹ̀mí (bíi tayé ni)
Ṣé nígbà tí a ti di eegun t’ó kẹfun tán
Wọ́n wí pé: "Ìdápadà òfò nìyẹn nígbà náà (fún ẹni t’ó pè é nírọ́)
Nítorí náà, igbe ẹyọ kan sì ni
Nígbà náà ni wọn yóò bára wọn lórí ilẹ̀ gban̄sasa
Ǹjẹ́ ọ̀rọ̀ (Ànábì) Mūsā ti dé ọ̀dọ̀ rẹ
(Rántí) nígbà tí Olúwa rẹ̀ pè é ní àfonífojì mímọ́, Tuwā
Lọ bá Fir‘aon, dájúdájú ó ti tayọ ẹnu-àlà
Kí o sì sọ pé: "Ǹjẹ o máa ṣàfọ̀mọ́ ara rẹ (kúrò nínú àìgbàgbọ́) bí
Kí èmi sì fi ọ̀nà mọ̀ ọ́ dé ọ̀dọ̀ Olúwa rẹ. Nítorí náà, kí o páyà (Rẹ̀)
Ó sì fi àmì t’ó tóbi hàn án
(Àmọ́) ó pè é lópùrọ́. Ó sì yapa rẹ̀
Lẹ́yìn náà, ó kẹ̀yìn sí i. Ó sì ń ṣiṣẹ́ (takò ó)
Ó kó (àwọn ènìyàn) jọ, ó sì ké gbàjarì
Ó sì wí pé: "Èmi ni olúwa yín, ẹni gíga jùlọ
Nítorí náà, Allāhu gbá a mú pẹ̀lú ìyà ìkẹ́yìn àti àkọ́kọ́ (nípa ọ̀rọ̀ ẹnu rẹ̀ ìkẹ́yìn yìí àti àkọ́kọ́)
Dájúdájú àríwòye wà nínú ìyẹn fún ẹni t’ó ń páyà (Allāhu)
Ṣé ẹ̀yin lẹ lágbára jùlọ ní ìṣẹ̀dá ni tàbí sánmọ̀ tí Allāhu mọ
Allāhu gbé àjà rẹ̀ ga sókè. Ó sì ṣe é ní pípé t’ó gún régé
Ó ṣe òru rẹ̀ ní dúdú. Ó sì fa ìyálẹ̀ta rẹ̀ yọ jáde
Àti ilẹ̀, Ó tẹ́ ẹ pẹrẹsẹ lẹ́yìn ìyẹn
Ó mú omi rẹ̀ àti irúgbìn rẹ̀ jáde láti inú rẹ̀
Àti àwọn àpáta, Ó fi ìdí wọn múlẹ̀ ṣinṣin
Ìgbádùn ni fun yín àti fún àwọn ẹran-ọ̀sìn yín
Ṣùgbọ́n nígbà tí ìparun ńlá bá dé
ní ọjọ́ tí ènìyàn yóò rántí ohun t’ó ṣe níṣẹ́
Wọ́n sì máa fi Iná hàn kedere fún (gbogbo) ẹni t’ó ríran
Nítorí náà, ní ti ẹni t’ó bá tayọ ẹnu-àlà
tí ó tún gbé àjùlọ fún ìṣẹ̀mí ayé
dájúdájú iná Jẹhīm, òhun ni ibùgbé (rẹ̀)
Ní ti ẹni tí ó bá páyà ìdúró níwájú Olúwa rẹ̀, tí ó tún kọ ìfẹ́-inú fún ẹ̀mí (ara rẹ̀)
dájúdájú Ọgbà Ìdẹ̀ra, òhun ni ibùgbé (rẹ̀)
Wọ́n ń bi ọ́ léèrè nípa Àkókò náà pé: "Ìgbà wo l’ó máa ṣẹlẹ̀
Ọ̀nà wo ni ìwọ lè fi ní (ìmọ̀) ìrántí rẹ̀ ná
Ọ̀dọ̀ Olúwa rẹ ni òpin ìmọ̀ nípa rẹ̀ wà
Ìwọ kúkú ni olùkìlọ̀ fún ẹni t’ó ń páyà rẹ̀
Ní ọjọ́ tí wọ́n máa rí i, wọn máa dà bí ẹni pé wọn kò lò tayọ ìrọ̀lẹ́ tàbí ìyálẹ̀ta (ọjọ́) kan lọ (nílé ayé)

Prev Next