78.The Announcement

Nípa kí ni wọ́n ń bíra wọn léèrè ná
Nípa ìró ìkọ̀kọ̀ ńlá ni
èyí tí wọ́n ń yapa ẹnu sí
Rárá! Wọ́n ń bọ̀ wá mọ̀
Lẹ́yìn náà, ní ti òdodo wọ́n ń bọ̀ wá mọ̀
Ǹjẹ́ Àwa kò ṣe ilẹ̀ ní ìtẹ́ bí
àti àwọn àpáta ní èèkàn (fún ilẹ̀)
A sì ṣẹ̀dá yín ní oríṣiríṣi (akọ àti abo)
A ṣe oorun yín ní ìsinmi
A tún ṣe alẹ́ ní ìbora
A tún ṣe ọ̀sán ní (àsìkò fún) wíwá ìjẹ-ìmu
A tún mọ sánmọ̀ méje t’ó lágbára sókè yín
A tún ṣe òòrùn ní ìmọ́lẹ̀ t’ó ń tàn gbòlà
Àti pé A sọ omi t’ó ń bọ́ tẹ̀léra wọn kalẹ̀ láti inú àwọn ẹ̀ṣújò
nítorí kí Á lè fi mú kóró èso àti irúgbìn jáde
pẹ̀lú àwọn ọgbà t’ó kún digbí fún n̄ǹkan oko
Dájúdájú ọjọ́ ìpínyà, ó ní gbèdéke àkókò kan
(Ìyẹn ni) ọjọ́ tí wọ́n á fọn fèrè oníwo fún àjíǹde. Ẹ̀yin yó sì máa wá níjọ-níjọ
Wọ́n sì máa ṣí sánmọ̀ sílẹ̀. Ó sì máa di àwọn ìlẹ̀kùn
Wọ́n máa mú àwọn àpáta rìn (bọ́ sí àyè mìíràn). Ó sì máa di ahúnpeéná
Dájúdájú iná Jahanamọ, ó lúgọ sílẹ̀ lójú ọ̀nà
(Ó jẹ́) ibùgbé fún àwọn alákọyọ
Wọn yóò máa gbé inú rẹ̀ fún ìgbà gbọọrọ
Wọn kò níí rí ìtura tàbí ohun mímu kan tọ́wò nínú rẹ̀
àyàfi omi gbígbóná àti àwọyúnwẹ̀jẹ̀
(Ó jẹ́) ẹ̀san t’ó ṣe wẹ́kú (iṣẹ́ wọn)
Dájúdájú wọn kì í retí ìṣírò-iṣẹ́
Wọ́n sì pe àwọn āyah Wa nírọ́ gan-an
Gbogbo n̄ǹkan sì ni A ti ṣe àkọsílẹ̀ rẹ̀ sínú Tírà kan
Nítorí náà, ẹ tọ́ (ìyà) wò. A ò sì níí ṣe àlékún kan fun yín bí kò ṣe ìyà
Dájúdájú ìgbàlà wà fún àwọn olùbẹ̀rù (Allāhu)
Àwọn ọgbà àti èso àjàrà
àti àwọn ọlọ́mọge, tí wọn kò júra wọn lọ lọ́jọ́-orí
àti ife ọtí t’ó kún dẹnu (ni ẹ̀san wọn)
Wọn kò níí gbọ́ ìsọkúsọ àti ọ̀rọ̀ irọ́ nínú rẹ̀
(Ó jẹ́) ẹ̀san láti ọ̀dọ̀ Olúwa rẹ, (ó sì jẹ́) ọrẹ ní ìbámu sí ìṣírò-iṣẹ́ (wọn)
(Ẹsan náà wá láti ọ̀dọ̀) Olúwa àwọn sánmọ̀, ilẹ̀ àti ohun t’ó wà láààrin méjèèjì, Àjọkẹ́-ayé. Wọn kò sì ní ìkápá ọ̀rọ̀ lọ́dọ̀ Rẹ̀
Ọjọ́ tí mọlāika Jibrīl àti àwọn mọlāika (mìíràn) yóò dúró ní ọ̀wọ̀ọ̀wọ́. Wọn kò sì níí sọ̀rọ̀ àfi ẹni tí Àjọké-ayé bá yọ̀ǹda fún. Onítọ̀ún sì máa sọ̀rọ̀ t’ó ṣe wẹ́kú
Ìyẹn ni ọjọ́ òdodo. Nítorí náà, ẹni tí ó bá fẹ́ kí ó mú ọ̀nà tó máa gbà ṣẹ́rí padà sí ọ̀dọ̀ Olúwa rẹ̀ pọ̀n (ní ti ìronúpìwàdà)
Dájúdájú A fi ìyà t’ó súnmọ́ ṣe ìkìlọ̀ fun yín. Ọjọ́ tí ènìyàn yóò máa wo ohun tí ó tì síwájú, aláìgbàgbọ́ yó sì wí pé: "Yéè, èmi ìbá sì jẹ́ erùpẹ̀, (èmi ìbá là nínú ìyà)

Prev Next