23.The Believers

  1. Toto Abasuubili bamala okhubura
  2. Balia abehotselesinjia mukhulaama khwabu
  3. Nende Balia aberetsanga ehale nende amakhuwa kabulamwo oluchendo
  4. Nende Balia abarusinjia eshihanwa (izakaa)
  5. Nende Balia abalindanga ebiekenyi biabu
  6. Halali khubakhasi babu nohomba balia abemikhono chiabu emilunji chiatila, kho abo shibafunanibwa tawe
  7. Ne ulia wenya kalali kano tawe abo nibo babura eshichelo
  8. Nende balia bahenganga obwisikwa nende indakano yabu
  9. Nende balia balumiililanga khumalaamo kabu (iswala)
  10. Abo nibo balichelama. (balibukula)
  11. Nibo abalichelama Firdaus mwikulu balimenyamwo tsinyanga tsiosi
  12. Ne toto khwaloonga Omundu okhurulana nende liloba
  13. Mana nikhumulonga okhurulana nende amatsi kolwibulo, akarebwa akakwanile okhuba
  14. Mana nikhukalonga okhuba lilika, mana nikhulonga lilika okhuba shinga eshitonye shieyinyama, mana nikhulonga eshitonye shieyinyama okhubamwo ebikumba, mana nikhubifunikha ibikumba inyama, mana nikhumukhola okhuba eshilonje shindi. Niwoluyali muno Nyasaye Omulonji Omulayi muno umalayo
  15. Mana toto enywe imbeli wakano mulifwa
  16. Mana toto enywe mulilamusibwa inyanga yeyindukho
  17. Ne toto khwalonga hekulu wenyu tsinjila saba, ne efwe shikhwali ebebilila eshilonje shiosi shiosi tawe
  18. Ne khweshia amatsi kayelele okhurula mwikulu mana nikhukawotselesia khwiloba, ne toto efwe khuli nende obunyali bwokhukayiniaho
  19. Khu amatsi ako nikhubamesilia emikunda chietsitende nende tsizabibu, munyoolangamwo ebiamo ebinji biamulitsanga
  20. Nende omusala kurulanga khushikulu shia Sinai kurusinjia amafura okhuba kokhutongwamwo khubalia
  21. Ne toto mutsisolo mulimwo nende ameeko, khubanywesinjia khubilia bili mutsinda tsiatsio, ne munyoolangamwo obukhoonyi obunji ne etsindimwo mutsiliitsanga
  22. Ne hekulu watsio nende khubwaro muchingungwa
  23. Netoto khwaruma Nuhu khubandu bebe, mana naboola mbu; “Enywe Abandu banje mulaame Nyasaye mubula Nyasaye wundi owulali Ye tawe, kho shimuritsangakhwo tawe
  24. Mana omukanda kwabakhongo babakhayi nikuboola mbu; “ uno shini shiosishiosi tawe halali omundu shinga enywe, yenyanga okhwikhola omulayi khwinywe, ne Nyasaye yenyanga(okhubechesia) yakheshiye Abamalaika efwe shikhwawulilakhwo kano khubakofu befu bakhale tawe
  25. Uno Shali shiosi shiosi tawe halali ni Omundu uli nende lilalu. Mumulindilile butswa hatiti
  26. (Nuhu) naboola mbu; “Nyasaye wanje habine toto bano bamalile okhukhaya”
  27. Mana nikhumufimbulila mbu; “Kasia eliaro, embeli wetsimoni tsiefu nende obufimbuli kho olwa likhuwa liefu liliula,(eshialo nishitsula amatsi) awo winjisie buli tsimbia tsibili tsibili. Nende Abandu bobo halali ulia owelikhuwa lilie liamala okhubura, mbu oyo yakhasishe, kho olaboola ninasi khubalia abakholela obubii emioyo chiabu tawe. Toto abo balasishibwa.’’
  28. Ne olwa witsa okhunyoola obwihotselefu ewe nende abali halala ninawe mubwaro obo, boola mbu; “oluyali lwosi ni lwa Nyasaye owakhuhabina efwe okhurulana nende Abandu abonooni”
  29. Ne boola mbu “Nyasaye wanje, unzishie habundu wetsimbabaasi toto ewe newe omulayi muno wokhwishia.”
  30. Toto mukano khulinende ameeko amakhongo, ne toto efwe khwali bokhubakholela amatemo
  31. Mana nikhurera inyuma wabu Abandu bandi
  32. Mana nikhubarumila Abarumwa okhurula mubo, okhubaboolela mbu; “mulaame Nyasaye, mubula Nyasaye wundi owulali ye tawe, shimuritsangakhwo tawe?”
  33. Mana omukanda kwabakhongo babakhayi okwakhaya nikuyingasia omukhung’ano kweyindukho, mana nikhubayindiasia khubulamu bwo khushialo, baboola mbu; “Uno shini shiosishiosi tawe halali ni Omundu shinga enywe, elitsanga ebiamulitsanga, ne anywetsanga ebia munywetsanga.”
  34. Ne nimuloonda Omundu butswa shinga enywe, mulaba musishile
  35. Abalakanga mbu nimumalile okhufwa nimubeele liloba nende ebikumba, mbu mulilamusibwa
  36. Shikanyalikhana tawe , shikanyalikhana tawe, akamulakungwa ako
  37. Toto buno ni obulamu bwo khushialo, khufwitsanga nekhumenyanga, ne efwe shikhulilamusibwa tawe
  38. Toto uno ni Omundu wachishilasa Nyasaye obubeyi ne efwe shikhumusuubila tawe
  39. Yaboola mbu; “Nyasaye wanje habine khukabayingasiyie
  40. Naboola mbu; “Ahambi hano betsa okhwiyitsulisia.”
  41. Mana oluyoka nilubabukula khubwatoto mana nikhubakhola shinga amakokha kabenganga khumatsi, nibakorera ehale Abandu ababii
  42. Mana nikhurera inyuma wabu Abandu bandi
  43. Ne kubulao omukanda kunyala okhuranjilisia indukho yakwo nohomba okhusitia imbeli
  44. Mana nikhuruma Abarumwa befu, mulala inyuma wowundi. Buli omukanda shingala Omurumwa wabu yaboolela bamuyingasia. Nikhubalondiakho abandi mubo khubandi, mana nikhubakholela okhuba tsingano. Bakorera ehale Abandu balasuubilanga
  45. Mana nikhuruma Musa nende Omusiani wabu Haruni halala nende ebimanyisio biefu, nende ebifune bili habulafu
  46. Khwamuruma khu Firauni nende Abandu baye abakhongo, halali bo nibelola nibaba Abandu abafuuru
  47. Nibaboola mbu; “Khusuubile Abandu babili bano balisa shinga efwe, ne Abandu babu ni Abasumba befu?”
  48. Mana nibabayingasia mana nibaba mubalia abasikha
  49. Ne toto khwahelesia Musa eshitabo mbu bakhaba bario banyoola okhulunjikha
  50. Ne nikhukhola Omwana wa Mariamu nende nyina wuwe okhuba eshimanyisio, ne nikhubahelesia amelushilo, habundu achingukha hali nende obwihotselefu nende tsisebele tsia amatsi
  51. Enywe Abarumwalieebilibwaebilayi ne mukhole amalayi, toto esie endi Omumanyi muno khukamukholanga
  52. “Ne toto omukanda kwenyu kuno ni omukanda mulala, nasi esie endi Nyasaye wenyu omulesi , kho muurie”
  53. Mana nibabusia hakari wabu likhuwa lino tsimbeka tsikabukhane. Buli omukanda nikusangalila akakuli ninakwo
  54. Kho baleshesa mubukoyani bwabu okhula shinga ebise biula
  55. Baparanga mbu bilia ebiakhubahelesinjia Omwandu nende Abana
  56. Nibio bakhubaranjilisinjia khubulayi, halali abeene shibamanyile tawe
  57. Toto balia behotselesinjia khulwa okhuria Nyasaye wabu Omulesi
  58. Nende balia abasuubilanga ebimanyisio bia Nyasaye wabu Omulesi
  59. Nende balia abalatsokaasinjia Nyasaye wabu tawe
  60. Nende balia barusinjia abiabahebwa, emioyo chiabu nichiririre mbu balikalukha ewa Nyasaye wabu Omulesi
  61. Abo nibo abanguyilanga amakhuwa amalayi, ne nibo bakaranjililanga
  62. Nafu shikhutukhanga Omundu akaalanyala tawe, ne khuli nende eshitabo eshiboolanga katoto, nabo shibalikholelwa obubii tawe
  63. Halali emioyo chiabu chili mubukoyano nende ako, ne bali nende ebikhole biabakholanga ebilali ebo (ebia Abandu abalayi bakholanga)
  64. Okhula shinga khwitsa okhutila balia bali mubwokholo mubo, awo niwo wabalitsa okhulilikana
  65. “Mulalilikana Nyangayino tawe, toto enywe shimulaona okhurulana ninafu tawe”
  66. Toto mwasomelungwa tsinyaali tsianje, halali enywe mwakalushilanga inyuma nebisisilo bienyu
  67. Nimwilola , nimuyilomalomakhwo eshilo (khu Ikurani) nimulechele
  68. Koo! Shibaparangakhwo amakhuwa (akayetsa nako Omurumwa Muhammad) Nohomba kabetsela akaletsela bapapa babu beyimbeli
  69. Nohomba shibamanya Omurumwa wabu tawe khomana nishichila nibamuyingasinjia
  70. Nohomba baboolanga mbu; “(Omurumwa uno) ni omulalu? Halali yabetsela khubwatoto, ne abaanji mubo obwatoto bwabasinya
  71. Ne obwatoto mulondanga obwikombi bwabu, likulu nende eshialo biakhabiyile nende ebilimwo biosi, Halali khwabarerera ametsulisio kabu, halali bo nende ametsulisio kabu beretsanga ehale
  72. Nohomba abasabanga omurungo? Halali omurungo kwa Nyasaye wuwo nikwo omulayi, ne niye Omukabi omulayi muno umalayo
  73. Ne toto ewe obalanganga khunjila ingolofu
  74. Ne toto balia balasuubilanga mwikulu tawe beretsanga ehale nende injila eyo
  75. Ne kata khubabeelanga tsimbabaasi mana khubarusilia obutinyu bwabali ninabo, bakhatsililile mubukori bwabu, nibakoyanile
  76. Ne toto khwabahelesia eshinyasio (Eshilulu) halali shibakalushila Nyasaye wabu tawe, nohomba shibehotselesia tawe
  77. Okhula shingala khwabekulila omuliango kweshinyasio eshilulu, awo niwo Abandu bawesiakho omwoyo
  78. Ne ye niye owabalonjela amarwi nende tsimoni nende emioyo, ne matiti muno akamukhupanga orio
  79. Naye niye owabaswania khushialo ne ni ewuwe amulikhung’asibwa
  80. Ye niye uhelesinjia obulamu nende okhufwisia, ne amakalukhano keshilo nende eshitere ni akeke, koo shimumanyakhwo tawe
  81. Halali baboolanga shingala Abandu bali imbeli baboolanga
  82. Baboolanga mbu; “Koo olwakhuliba nikhufwile mana nikhuli liloba nende ebikumba, mbu khokhulilamusibwa?”
  83. Toto khwalakwa kano nende bapapa befu bakhale, kano nitsingano tsiakhale butswa
  84. Boola; “Liloba nende ebilimwo biosi nibiawina toto nikali mbu mumanyile”
  85. Balaboola mbu; “Ni bia Nyasaye” boola: “koo shimwitsulilangakhwo tawe.”
  86. Boola ni wina Omwami Omulesi wa makulu saba nende Omwami Omulesi weshisaala eshikhongo
  87. Balaboola mbu; “Ni bia Nyasaye” Boola; “ kho koo shimuritsanga tawe?”
  88. Boola; “ni wina womumukhono kukwe bulimwo obwami bwa buli eshindu naye niye ulindanga, nesishilindungwa eshia alenyele tawe, toto nimumanyile (mumbolelekhwo)
  89. Balaboola mbu: “obunyali obo nibwa Nyasaye,” khoboola mbu; “Kho mukatibungwa murie
  90. Khubarerere obwatoto halali toto abo ni ababeyi
  91. Nyasaye abula Omwana yesiyesi , nohomba abulao Nyasaye wundi halala ninaye tawe. Kabetsanga kario buli Nyasaye yakhabukule eshiayaloonga ne abandi mubo bakhashilile abandi, toto Nyasaye ali ehale nende okhufumia khwabamufuminjia okho
  92. Omumanyi wakefisile nende akali habulafu, ne ali hekulu muno, khukabalia bamutsokasinjia halala ninaye
  93. Boola; “Nyasaye wanje ni unzechesia eshinyasio eshiabalakungwa
  94. Nyasaye wanje Omulesi olasaasia halala nende Abandu ababii abo tawe
  95. Netoto efwe okhukhwechesia akakhwalaka khuli abamanyala
  96. Ikalila amabii khukhukhola amalayi efwe khumanyile muno akababoolanga
  97. Ne boola mbu; “Nyasaye wanje Omulesi ndilinda khwiwe okhurulana nende eshibeyibeyi shia Mashetani.”
  98. Ne ndiliinda khwiwe Nyasaye wanje Omulesi kalasitakhwo tawe
  99. Okhuula Olwa lifwa liulila mulala wabu aboola mbu; “Nyasaye wanje ngalusia khushialo.”
  100. Ndakhaba endio ndakhola amalayi kandalekha(Abamalaika balimukalusia mbu) Shikari kario tawe, ni likhuwa butswa lialomalomanga ye mwene, ne imbeli wabu khuli nende obulamu bwemakombe okhula inyanga yokhulamusibwa
  101. Olwa olwika lulikhupwa owo olwikho shilulibaho inyanga eyo tawe, ne shibalireebana tawe
  102. Kho balia abamalayi kabu kaliba amasiro abo nibo balibura
  103. Ne balia abamalayi kabu kaliba amangu, abo betibia abeene, ne baliikhala mumulilo tsinyanga tsiosi
  104. Omulilo kulinyibulula obweni bwabu, nabo baliyenyelamwo ameno khukhunyakhana
  105. Koo! Tsinyali tsianje shimwasomelungwa nanyu nimutsiyingasia
  106. Baliboola mbu; “Nyasaye wefu Omulesi, obubii bwefu bwakhuyinga muno, mana nikhuba Abandu abakori
  107. Nyasaye wefu Omulesi khurusie mumulilo kuno,(okhukalusie khushialo khukhole amalayi,) nenikhukalulishila khandi khulaba ababii
  108. Aliboola mbu; “Nyiremwo tsi!! Nemulalomialomia tawe.”
  109. Toto omukanda kwaliwo kwabasumba banje, kwaboolanga mbu; “Nyasaye wefu khusuubile, kho khuleshele ebionono biefu, ne okhubeele tsimbabaasi nawe newe owetsimbabaasi okhushila boosi.”
  110. Mana nimubakholela omachayo, mana okhula shinga babakoyania okhunzitsulila, nemwabatsekhanga
  111. Toto esie abarunjile inyanga yino khulwa okhwifwila khwabu, abo nibo abalibura
  112. Aliboola mbu; “Mwekhala ebise biyela birie khushialo, khukhubala khwemika?”
  113. Baliboola mbu; “khwekhalamwo inyanga ndala nohomba ebise muyinyanga, kho reba balia ababalanga
  114. Aliboola mbu; “Enywe shimwekhalamwo halali ebise bititi butswa, mumanyakhwo!.”
  115. Koo! Muparanga mbu khwabaloonga eshikhaya butswa, ne mbu enywe shimulikalusibwa khwifwe tawe
  116. Niwoluyali Nyasaye Omwami watoto, abulaho ulaamungwa khubwatoto halali Ye, Nyasaye weshisaala shioluyali
  117. Ne ulia ulaamanga halala nende Nyasaye, nyasaye wundi, ye abula eshifune okhukhola ario, ne toto isabu yiyie ili khu Nyasaye wuwe Omulesi. netoto abakhayi shibalibura tawe
  118. Ne boola mbu; “Nyasaye wanje! Leshela ne obeele tsimbabaasi, newe toto Omulayi wababeeli betsimbabaasi
Prev Next