22.The Pilgrimage

1. Enywe Abandu murie Nyasaye toto omuseso kweyinyanga yeyindukho ni likhuwa likhongo
2. Inyanga yamuliyilola (indukho eyo) buli omukhasi ununia aliibilila Omwana wanuninjia, ne buli uli inda ilirula, ne olilola Abandu shinga bameelele nabo nibalameelele tawe halali eshinyasio shia Nyasaye nishio shili eshilulu
3. Ne Mubandu balimwo bayingananga khu Nyasaye nibabula obumanyi, ne baloondanga buli shetani omukhayi
4. (Shetani oyo) yalachilwa mbu yesiyesi umukhola okhuba omwitsa , toto ye alamukosia ne alamulunjisia khushinyasio shiomulilo omululu
5. Enywe Abandu ni muli mubukanakani okhulondokhana nende okhulamusibwa (kho muhenje shingala khwabalonga) toto efwe khwabaloonga okhurula khwiloba (papa wefu Adam) mana nikhubaloonga okhurulana nende amatsi kolwibulo mana (nikhubalonga) mwaba amalika mana nibiba eshitonye shieyinyama shilonjekhanga nende shilalonjekhanga tawe, kho khunyoole okhubeenosilia nafu khwikhasinjia mutsimbeleshelo eshiakhwenya okhula ebise biashio, mana nibamurusiamwo nimuli Abana , mana okhula mube abakhongo. Ne mwinywe baliho bafwitsanga, nemwinywe baliho bosibungwa khulubaka lwokhusakhula okhula bakorwe okhumanya mubumanyi shiosishiosi nabeelenje omumanyi. Ne olola liloba nilihotselesie tsi, ne olwa khuliishilinjia amatsi hekelu walio lisakasinjia nilikhusia nende okhumesia buli imbia yomumela omulayi
6. Endio nilwokhuba mbu Nyasaye niwatoto, ne toto mbuYe alamusinjia abafu. Ne mbu Ye nomunyali wabuli eshindu
7. Ne mbu toto indukho ilitsa, obukanakani bubulaho tawe, netoto mbu Nyasaye alilamusia abali mubilindwa
8. Ne mubandu baliho abayingananga khu Nyasaye nibabula obumanyi tawe, nohomba obulunjifu nohomba eshitabu shiobulafu
9. Abashukhasinjia amakosi kabu khulwokhukosia Abandu khunjila ya Nyasaye balinyoola khushialo eshinyasio, ne khulitisia shiamulala wabu inyanga yeyinduukho eshinyasio shiomulilo
10. Kano nilwokhuba akemikhono chiabu chiaranjilisia netoto mbu Nyasaye shakholelanga Abasumba bebe obubii tawe
11. Ne Mubandu baliho balaamanga Nyasaye khundulo, obulayi nibumuulila abukumakhwo, ne obutinyu nibumunyoola akalukhana khubweni bubwe, yatiba khushialo nende mwikulu, okho nikho okhutiba okhwa habulafu
12. Alamanga ebilali Nyasaye ebilakhamukhola eshindu tawe nohomba okhumukhoonya tawe, obo nibo obukori buli ehale muno
13. Alaamanga balia khubwatoto bwene, abokhubiyilwa khwabu khuli ahambi, okhushila okhukasilibwa khwabu, toto ni abalindi ababii po ne ni abetsa ababii muno
14. Toto Nyasaye alinjisia balia abasuubila mana nibakhola amalayi mwikulu owemikunda chiburanga hasi wachio emialo. Toto Nyasaye akholanga shiayenya
15. Ulia uparanga mbu Nyasaye shalimuhabina (Omurumwa wuwe tawe) khushialo nende mwikulu, awo aboye omukoye hekulu, mana yemiche mana alolekhwo ebifwanga bibie nibiyiniaho kalia kamusinyisiyie
16. Ne endi nilwakhwayishia (Ikurani) tsinyaali tsinoosia amakhuwa kali habulafu, ne toto Nyasaye alunjisinjia owayenya
17. Toto balia abasuubila nende balia Abayahudi , nende Abasabai, nende Abakiristo, nende Abajusi nende abatsokaasia Nyasaye, toto Nyasaye alibusia hakari wabu inyanga yeyindukho, toto Nyasaye nomuloli wabuli eshindu
18. Koo shololangakhwo mbu binamilanga Nyasaye buli shili mwikulu nende khushialo, nende eliuba nende omwesi nende tsing’ining’ini nende tsingulu nende emisala nende tsisolo nende abaanji mubandu? Ne abaanji bakhoyeshela eshinyasio. Ne ulia wa Nyasaye atutuyia abulaho umuhelesia eshiribwa. Toto Nyasaye akholanga shingala yenya
19. Babili bano bafunanilanga shichila Nyasaye wabu. Kho balia bakhaya balitetelwa tsingubo tsiomulilo, ne baliyombolwa hekulu we mirwe chiabu amatsi karabachilanga
20. Khumatsi ako, kalisalulusia ebili munda mwabu nende likhoba liomubili kwabu lioosi
21. Ne balinyoola tsindabushi tsiebichuma
22. Buli olwabalienya okhurulamwo shichila obululu balikalusibwa mwo butswa 22. , baliboolelwa mbu: “ mupile eshinyasio shiokhuyia”
23. Toto Nyasaye alinjisia balia abasuubila mana nibakhola amalayi mumikunda chiburanga hasi wachio amatsi. Balifwalamwo ebirone biokhumikhono ebie idhahabu nende ebisole (lulu) ne ebifwalo biabu biliba bia hariri.(ebirerere bimesamesa)
24. Ne balilunjisibwa okhutsia khumakhuwa amalayi, ne balilunjisibwa khunjila ya ulia witsoomibungwa
25. Toto balia bakhaya mana nibekalila (Abandi) khunjila ya Nyasaye nende omusikiti kwoluyali, okwakhwakhola Abandu boosi okhuba nashilala, khubalia bekhalangamwo nende abandi, ne buli yesiyesi ulienya okhukholamwo obukori nende obubii khulimuhelesia eshinyasio shiwumisinjia
26. Ne (yitsulila) olwa khwekhasia Ibrahim habunduweyinzuilia, mananikhumuboolela mbu: “ olanzokasiakhwo nende shiosi shiosi tawe ne otswenule inzu yanje khulwa balia bayibotokhananga nende balia benamanga nende okhusujuda (baretsanga obweni bwabu hasi)
27. Ne nikhumuboolela mbu : “ osaalanie likhuwa mubaandu okhulondokhana nende likhuwa lia Hijja balakhwitsila nibachenda ne abaandi nibali hekulu weyisolo yang’aya (khumachong’e kokhunjila) nibeetsa okhurula khunjila eyahale
28. Khobanyoole okhwilolela obukhonyi bwabu, ne khobamete okhwitsulila elira lia Nyasaye, mutsinyanga tsimanyikhane , khulwa kalia akabakabile, natso netsisolo tsiebilenje bine, nemulie khutsisolo etso ne mulisie ulia ulikhubusandi omutakha
29. Mana boosie ebibii biabu , mana bakhole akabalakana nende Nyasaye mumioyo chiabu, ne babotokhane inzu yakhale (al Kaaba)
30. Ne endio nilwakali, ne ulia uhetsanga oluyali ebindu bioluyali ebia Nyasaye , obo nobulayi khuye khu Nyasaye wuwe. Ne mufuchililwa okhulia tsisolo halali tsilia etsia musoomelungwa (mukurani) khomana mwire ehale nende eshifwolo shiebifwanani ne mwire ehale nende amakhuwa kobuchishi
31. Mwitswenushile khu Nyasaye okhubula okhumutsokasia. Ne ulia utsokasinjia Nyasaye alishinga ukwile okhurula hekulu, mana amayoni nikamupusula yemwene, nohomba omuyaka nikumusukuna habundu ehale
32. Ne ni endio olwa uhetsanga oluyali ebilolelo bia Nyasaye, elo nilikhuwa liokhuria Nyasaye mumioyo
33. Ne (mutsisolo etso) mulimo nende obukhoonyi bwenyu okhula ebise bimanyikhane, ne habundu wokhubisinzila (ebiayo ebo) ni khunzu yakhale ilia
34. Ne buli omukanda khwakukasilia habundu wokhusinzila owemilukha, kho lirumbulwe elira lia Nyasaye khubia abakabile mutsisolo etso etsia makulu kane. Mana Nyasaye wenyu nimulala butswa, mwihotselesie khuye. Ne suubisia abehotselefu
35. Balia olwa Nyasaye narumbulwa emioyo chiabu chirenganga, ne besumilisinjia khukabanyoolanga, nebalumililanga okhulaama, ne khubilia ebiakhubakabile bahininjia eshihanwa
36. Ne tsingamia ( tsing’ombe nende tsimbusi nende amakoondi keshihanwa) khwabakholela okhuba ebimanyisio bia Nyasaye , khubio mulimwo nende obulayi obunji. Kho murumbule elira lia Nyasaye olwa biemanga olunyaali (okhusinzwa) ne olwa bikwitsanga nolubafu, mulie khubio ne mulisie abakhayi basabanga nende balia babeyabeyanga nibalasaba tawe. Ne endio nilwakhwabakholela Abandu okhubawulila kho munyoole okhupa orio
37. Tsinyama tsiatsio shitsiloolela Nyasaye tawe, nohomba amatsayi katsio, halali oburi bwenyu khu Nyasaye nibo bulamuulila. Ne endio nilwayabakwalasilia khomunyoole okhumwitsoomia khulwa okhubalunjisia khuno. Ne suubisia abakholi bamalayi
38. Toto Nyasaye alindanga balia basuubila , toto Nyasaye shiyachama buli ulia omukhobi , owulakhupanga orio tawe
39. Basubulwa okhulwana balia abakhuyungwa shichilabo baranjilwe. Ne toto Nyasaye niwobunyali bwokhubakhoonya
40. Balia barusibwa mutsinzu tsiabu munjila ilali yatoto, mbushichila boboolele mbu: “ Omulesi wefu ni Nyasaye” akhayanga okhulinda Abandu abandi mubo khubandi , toto amahekalu kakhafunakwe nende amakanisa nende tsinzu tsiamalaamo nende emisikiti chirumbulungwamwo elira lia Nyasaye muno. Toto Nyasaye alakhoonya ulia umukhoonya. Toto Nyasaye niwa amani muno Omushili
41. Balia olwakhubatinyisia khushialo balumilila okhulaama, nende okhurusia eshihanwa, ne balomesia okhukhola amalayi ne bakania okhukhola amabii, ne amakalushilo kamakhuwa koosi kali khu Nyasaye
42. Ne nibakhuyingasia bamala okhuyingasibwa imbeli wuwo Abandu ba Nuhu nende A’d nende Thsamud
43. Nende Abandu ba Ibrahim nende Abandu ba lut
44. Nende Abandu ba Madyana , ne Musa yesi yayingasibwa, mana nehelesia abakhayi ebise mana nebara mumukhono. Kho eshinyasio shianje shiali shirie
45. Ne nitsingongo tsinga tsiakhwasishia, etsiakholanga amabii, mana ebitsafu biabu nibibakwakho, nende amatikho ka amaatsi (ebisima) kalekhwa nende tsinzu tsiesichikha
46. Koo shibachendangakhwo khushialo tawe , khobanyoole emioyo chiokhuparira, nohomba amarwi kokhuwulilila? Toto tsimoni shitsiwofulanga tawe halali emioyo, chili mubilifu nicho chiwofulanga
47. Ne bakhuyungubasinjia mbu orere eshinyasio, halali Nyasaye shalafunaka indache yiyie tawe. Ne toto inyanga ewa Nyasaye wuwo ili shinga emika iyelefu shingala enywe mubalanga
48. Ne tsingongo tsinga tsiandahelesia ebise, natsio nitsikholanga amabii, mana netsira mumukhono, ne ewanje niwo amakalushilo
49. Boola mbu: “enywe Abandu esie endisa omwikanyilisi wenyu owahabulafu”
50. Kho balia basuubila mana nibakhola ebikhole ebilayi balinyoola obulesheli nende omukabo kweshiroonyo
51. Ne balia betinyinjia okhuyingasia ebimanyisio biefu abo nibo Abandu bomumulilo
52. Ne shikhwarumakhwo imbeli wuwo Omurumwa owahelesibwa eshitabu nohomba Omurumwa owulahelesibwa eshitabu, halali olwa asoma, shetani eretsanga obutswatswani mumasomo ako. Halali Nyasaye arusinjia akashetani aretsangamwo, mana Nyasaye atinyisinjia tsinyaali tsitsie , ne Nyasaye ni Owaamani owamachesi muno
53. Kho akhole kalia akashetani aretsangamwo okhuba amatemo khubalia abali nende obulwale mumioyo chiabu, nende balia abemioyo chiabu chioma. 22. Netoto abamabii bali mubukabukhani obwahale
54. Ne mbu khobamanye balia abahebwa obumanyi mbu ni obwatoto okhurula khu Nyasaye wuwo ne babusuubile. Ne khulwa okhwihotselesia khuye emioyo chiabu. Ne toto Nyasaye niye ulunjisinjia balia abasuubila khunjila ingololofu
55. Ne abakhayi balatsilila okhuba nende eshibeyibeyi khulwa elo(liawetsa nalio) okhuula shinga indukho iliboolela nohomba ibetsele inyanga ingumba, ibula obulayi bwosi bwosi
56. Obwami inyanga eyo buliba obwa Nyasaye, alibusia hakari wabu, kho balia basubila mana nibakhola ebikhole ebilayi baliba mumikunda chobwokholo
57. Ne balia bakhaya mana nibayingasia ebimanyisio biefu abo baliba nende eshinyasio shietsisoni
58. Ne balia bawuya shichila idini ya Nyasaye mana niberwa nohomba nibafwa, toto Nyasaye alibakabila omukabo omulayi, toto Nyasaye ni omulayi umalayo mubakabi boosi
59. Alibenjisia habundu wabalichama. Ne toto Nyasaye ni omumanyi omwihotselefu muno
60. Ne ni endio, ne ulia urunga likhobo okhulondokhana shinga okholelwe obubii, mana khandi nakholelwa obubii toto awo Nyasaye alamuhabina . Toto Nyasaye ni Omunji weshileshelo neni Omunji wobulesheli
61. Endio nilwokhuba mbu Nyasaye yenjisinjia eshilo mushitere ne yenjisinjia eshitere mushilo, ne toto Nyasye ni Omuwulili po Owokhulola muno
62. Ne endio mbu toto Nyasye niye owatoto, ne mbu bia balaamanga bilali Nyasaye nibio ebilali biatoto, ne toto Nyasaye niye owehekulu omukhongo
63. Shololanga mbu Nyasaye yeshinjia amatsi okhurula hekulu, mana liloba nilikalukhana okhuba obukondo bwobunyasi, toto Nyasaye ni omwihotselefu owokhumanya muno
64. Ni ebibie biosi bili mwikulu nende khushialo, toto Nyasaye niye omuyinda owokhwitsoomibwa muno
65. Koo shololangakhwo mbu Nyasaye yabakwalasilia ebili khushialo nende ebininwa olwabiburanga munyanza khubuchami bubwe, ne yatililila likulu okhukhaya okhukwa khuliloba, halali khubuchami bubwe. Toto Nyasaye niwetsimbabaasi nende obukoosia muno khubandu
66. Ye niye owabahelesia obulamu, mana nabafwisia , mana khandi alibalamusia, toto Omundu ni omukhayi owamalayi muno
67. Buli omukanda khwakukholela emilukha chakwo echiakutilanga. Kho balashilana ninawe mulikhuwa lino tawe, ne langa khunjila ya Nyasaye wuw.o – toto ewe oli khunjila ingololofu
68. Ne nibatsililila okhuyingana ninawe boola mbu: “ Nyasaye amanyile muno kamukholanga.”
69. Nyasaye alibusia hakari wenyu inyanga yeyindukho khu kalia koosi akamukabukhananga
70. Shomanyilekhwo mbu Nyasaye amanyile akali mwikulu nende mushialo? Toto ako kali mushitabu. Toto ako khu Nyasaye ni amaangu
71. Ne balamanga habundu wa Nyasaye ebia Nyasaye aleshiliakhwo omunwa, nende ebia babula obumanyi khubio. Ne ababii balibula ubakhoonya
72. Ne nibasomelwa tsinyaali tsiefu tsili habulafu , olalola obweni bwabakhayi 22. nibwechesia obusinyifu. Bakhaba ahambi okhutsunushila balia ababasomelanga tsinyali tsiefu etso. Koo! ebaboolelekho amabii muno okhushila ako? Ni omulilo ,Nyasaye yarecheshela balia abakhaya, ne ni amakalushilo amabii muno
73. Enywe Abandu! mukhupilwa amachelasio kho murechelesie. Toto balia abamulamanga habundu wa Nyasaye shibanyala okhuloonga kata isi tawe, kata nibebuusia khulikhuwa elo, ne kata isi nibanuula eshindu shibanyala okhuyinuula tawe, ni omuteshele muno ukhaabanga nende ukhaabungwa
74. Shibahelesinjia Nyasaye oluyali shingala kenyekhana tawe. Toto Nyasaye ni wa Amaani Owokhushila
75. Nyasaye alobolanga Abarumwa Mubamalaika nende Mubandu, toto Nyasaye niwokhuwulila muno owokhulola po
76. Amanyile akali imbeli wabu nende akali inyuma wabu, ne ni ewa Nyasaye amakhuwa koosi kalikalusibwa
77. Enywe abasuubila mwiname nimufumama nemulaame Nyasaye wenyu Omulesi ne mukhole amalayi, mwakhaba murio mwanyoola okhubura
78. Ne mukhalabanile idini ya Nyasaye shingala kenyekhana. Ye niye owabawulila , ne shiyabahelesia amakhuwa mudini amasiro tawe. Emilukha chia papa wenyu Ibrahim niye wabalanga Abasalamu khale awo, nende mukurani muno mwesi mwalangwamo murio, kho Omurumwa abe omuloli khwinywe nanyu mube abaloli khubandu. Mana mulumilile okhulaama ne murusie eshihanwa, ne mutilane halala shichila Nyasaye. Ye niye Omwami wenyu. Ne ni Omwami omulayi uli arie uno! Ne ni omukhoonyi omulayi uli arie