15.The Rock

  1. Alif, laam, raa. Ɗen ko Aayeeje Deftere e janngeteende ɓannginnde
  2. Na waawi Heeferɓe ɓen yeloyto sinno ɓe laatino juulɓe
  3. Accu ɓe, ɓe ñaama ɓe dakmitoo, yela soklina ɓe; arma ɓe anndoya
  4. Men halkaali saare woo, si wanaa hara no woodani nde happu anndaaɗo
  5. Mofte woo adotaako lajal mun, ɓe nennantaake kadi
  6. Ɓe wi'i: "Ko an yo mo Deftere nden jippinaa e mun, an ko a feetuɗo
  7. Ko haɗno addanaa men Malaa'ikaaɓe, si a laatike goonguɗo
  8. Men jippinirtaa Malaa'ika si wanaa fii goonga; ɓe wonataa ontuma, nennanteeɓe
  9. Menen Men jippinii Deftere nden, Menen kadi ko Men reenooɓe nde
  10. Gomɗii Men nuliino ado maa, e leñi adinooɓe
  11. Nulaaɗo (woo) araali e maɓɓe si wanaa ɓe jalkitay mo
  12. Ko wano nii Men naadiri ɗum e ɓerɗe bonɓe ɓen
  13. Ɓe gomɗintaa nde, gomɗii sunna aramɓe ɓen yawtiino
  14. Hay si Men udditanno ɓe damal ka kammu, ɓe waɗtini hiɓe ƴawra heen
  15. ɓe wi'ayno: "Anndee gite amen ɗen hippa. Wurin ko men yimɓe mbilɗaaɓe
  16. Gomɗii Men waɗii ka kammu koode, Men cuɗirani ɗe ndaarooɓe
  17. Men reeni mbo e kala seytaane riiwaaɗo
  18. Si wanaa on wujjuɗo nanɗe, o jokkintina hoodere-fiɗaynnde jalɓunde
  19. Leydi ndin, Men weerti ndi Men werlii e mayri pelle, Men fuɗini e mayri kala huunde eɓɓaande
  20. Men waɗani on e mayri wuurirɗe, e ɓen ɓe on laatanooki arsikooɓe ɗum
  21. Huunde alaa si wanaa marga mun ko ka Amen, Men jippintaa ɗum si wanaa e eɓɓoore anndaande
  22. Men wurti keneeli ɗin hawrondirooji e duule; Men jippiniri ka kammu ndiyam Men yarniri on ɗam, wonaa onon mari ɗam
  23. Ko Menen kadi woni ko wuurnata Men wara, ko Menen woni ronooɓe ɓen
  24. Gomɗii Men anndii adiiɓe e mon ɓen Gomɗii Men anndii sakkitiiɓe ɓen
  25. Pellet, Joomi maa, ko Kanko mooɓoyta ɓe. Kanko ko O Ñeeño, Annduɗo
  26. Gomɗii Men tagii neɗɗanke on e senƴayngal, e (cenlatngal) loopal-ɓalewal ɓowrungal
  27. E jinnaaji ɗin, Men tagir ndu ko adii, e yiite ooyunge
  28. Janto tuma nde Joomi maa daalannoo Malaa'ika'en: "Min ko Mi tagiroowo ɓanndinke immorde e senƴayngal, e loopal-ɓalewal ɓowrungal
  29. si Mi fotndiii mo, Mi wuttii e makko ruuhu Am on, haray suuyanee mo ko on sujjuɓe
  30. Malaa'ika'en fow sujji ɓe denndaangal
  31. si wanaa ibuliisa, o salii tawdeede e sujjooɓe ɓen
  32. O daali: "Ko an yo Ibuliisa, e ko heɓu maa a laatodaaki e sujjuɓe ɓen
  33. O wi'i: "Mi wonatah sujjanoowo ɓanndinke mo Taguɗaa immorde e senƴayngal, e loopal-ɓalewal ɓowrungal
  34. O daali: "Yaltu ton, an on ko a riiwaaɗo
  35. pellet, kuddi fawike e ma haa ñalnde njoɓdi diina
  36. O wi'i : "Joomi am, nennitanam haa ñalnde ndeɓe immintintee
  37. O daali:"An,ko a jeyaaɗo e nennitanteeɓe ɓen
  38. haa e ñalaande happu anndaaɗo
  39. O wi'i: "Joomi am, sabu ko bewinɗaa mi kon, ma mi cuɗinan ɓe ka leydi, ma mi bewnu ɓe fow maɓɓe
  40. si wanaa jeyaaɓe Maa, laɓɓinaaɓe ɓen e maɓɓe
  41. O daali: "Ngol ɗoo ko laawol ka Am focciingol
  42. Pellet, jeyaaɓe Am ɓen, a alanaa ɓe cemmbe, si wanaa ɓen bewɓe jokkuɓe ma
  43. Pellet Jahannama on wonii fodoore maɓɓe ɓe fow
  44. Hinge mari dame jeeɗiɗi; damal kala e majje no mari geɓal senndaangal
  45. Pellet, gomɗuɓe ɓen wonii e aljannaaji e ɓulli
  46. Naatiree ɗi e kisial, ko on hooliiɓe
  47. Men ɗoofi kala ko woni e ɓerɗe maɓɓe e konnaagu(cokotaagal): ɓe wonti musiɗɓe fewtondirɓe e danɗe
  48. Tampere heɓataa ɓe ton, ɓe wonah kadi yaltintee ɓe ton
  49. Yeetito jeyaaɓe Am ɓen, ko Min woni Haforoowo, Hinnotooɗo On
  50. e wonnde lepte Am ɗen, ko ɗen woni lepte muusuɗe ɗen
  51. Yeetito ɓe kadi fii hoɓɓe Ibraahiima ɓen
  52. Tuma ɓe naatunoo ka makko ɓe wi'i: "Salaam (Kisiyee mon)". O maaki: "Menen ko men ɗenƴii ɓe on
  53. Ɓe wi'i: "Wata a faay, menen meɗen wewlinire [ɓiɗɗo] gorko ganndo
  54. O maaki: "E on wewliniray lam [ɗum] e hoore ko mi nawyi kon? E ko wewlinirton mi
  55. Ɓe wi'i: "Men wewlinirii ma goonga, wata a jeye e taƴiiɓe ɓen
  56. O maaki: "Ko hommbo taƴotoo e yurmeende Joomi mun nden, si wanaa majjuɓe ɓen
  57. O maaki: "Ko woni fii mon, onon ɓee imminaaɓe
  58. Ɓe wi'i: "Menen men nulaa ko e yimɓe bomɓe
  59. si wanaa ɓeynguure Luuti nden, pellet ko men daɗndooɓe ɓe denndaangal
  60. si wanaa debbo makko on". Men hoddirii on ɗon ko jeyaaɗo e halketeeɓe ɓen
  61. Nde imminaaɓe ɓen aruno ka ɓeynguure Luuti
  62. O maaki: "Onon ko on yimɓe faaytaa ɓe
  63. Ɓe wi'i: "Wurin men addanii ma ko ɓe wonunoo e sikkitaade kon
  64. Men addanii ma goonga kan, pellet ko men goonguɓe
  65. Yahdu e ɓeynguure maa nden ka taƴitannde jem- ma, jokkaa ɓaawo maɓɓe; hara gooto e mo'on yeƴƴitaaki, rewon ka yamiraɗon
  66. Men anndini mo on fiyaaku: wonnde wattannde ɓee ɗoo, ko taƴeteeɗum ka subaka
  67. Yimɓe saare nden ari hiɓe wewla
  68. O maaki: "Ɓee ɗoo ko hoɓɓe am, wata on wirtam
  69. Hulee Alla, wata on hoynam
  70. Ɓe wi'i: "E men haɗaali ma [weernugol] tagoore nden
  71. O maaki: "Ɓee ɗoo ko jiwɓe am, si wonii ko on waɗooɓe [goɗɗum]
  72. Mi woondirii nguurndam maa! Ɓe wonii e siwrugol maɓɓe hiɓe wemmbii
  73. Haacaango ngon nanngiri ɓe ka puɗal
  74. Men waɗtiniri dow mayre on ley mayre, Men saaƴini(toɓri) e maɓɓe kaaƴe iwruɗe e loope juɗaaɗe
  75. Wonii e ɗum, maandeeji wonannde ɓen teskotooɓe
  76. Pellet, ɗen [ca'e] no e jurol(bolol) ñiiɓungol
  77. Wonii e ɗum, maande wonannde ɓen gomɗimɓe
  78. Gomɗii yimɓe fitaare(sutu) ɓen [kadi] ko tooñuɓe
  79. Men yoɓtii e maɓɓe. Pellet ɗen [ca'e] ɗiɗi wonii e laawol ɓanngungol
  80. Gomɗi yimɓe (aynde) Hijiri nden fennii Nulaaɓe ɓen
  81. Men addani ɓe aayeeje Amen ɗen, ɓe laatii ɗuurniiɓe ɗe
  82. Hari hiɓe lesoynoo e pelle ɗen cuuɗi, ko ɓe hooliiɓe
  83. Haacaango ngon nanngiri ɓe ka subaka
  84. Nafaaniɓe kon ko ɓe laatinoo hiɓe faggitoo
  85. Men tagiraali kammuuli ɗin e leydi ndin, e ko woni hakkunde majji kon, si wanaa e goonga. Pellet, darngal ngal ko arayngal! yaafora jaafaggol labaangol
  86. Tabitii ko Joomi maa woni Taguɗo, Annduɗo
  87. Gomɗii Men okkii ma jeeɗiɗi ummorde ɗimmitaa-ngol, e Alqur'aanaare mawnde nden
  88. Wata a ɓamtu gite maa ɗen e neemaaji ɗi Men dakmiti ɓe e mum en, wata a sunu e maɓɓe, lesɗin becce maa ɗen gomɗimɓe ɓen
  89. Maaku: "Min ko mi jertinoowo ɓannginoowo
  90. Wano Men jippinirnoo e senndooɓe [defte Alla] ɓen [lepte]
  91. Ɓen waɗuɓe Alqur'aanaare nden geɓe-geɓe
  92. Mi woondirii Joomi maa! Ma Men lanndoyo ɓe fow maɓɓe
  93. fii ko ɓe wonunoo e huuwude
  94. Feññin ko yamira-ɗaa kon, ɗuurno-ɗaa sirkooɓe ɓen
  95. Menen Men yonii ma e ɓen jalkitooɓe
  96. ɓen waɗdooɓe e Alla reweteeɗo goo. Aray ka ɓe annda
  97. Gomɗii Meɗen anndi wonnde bernde maa nde na ɓiɗtora ko ɓe wowlata kon
  98. Subbhinor yettugol Joomi maa, laato-daa e sujjooɓe ɓen
  99. rewaa Joomi haa yananeede (maayde) ara e maa
Prev Next