Yaha! M (Mani Naawuni) po yuŋ, di yi ti yɛn chaŋ yεɣi
Achiika! Di puuni mali pɔri n- zaŋ ti ninvuɣu so ŋun mali haŋkali
Di ni bɔŋɔ, a bi nya a Duuma ni daa niŋ Aadunim’ (Annabi Hudu niriba) shɛm
Bana n-nyɛ Iramanim’ ban nama daa galsi galsi
Ka bɛ daa nyɛla bɛ ni na ʒin nam shɛba tatabo tiŋgbana ni. -Affa shɛba yɛli ni Naawuni pola nolɔri goli bahigu biɛɣu pia, ka shɛba mi yɛli ni chimsi goli pilgu bɛɣu pia
Ni Samuudunim’ ban daa ŋmari tampima (ka di leeri yiya) yiliŋ ni
Ni Fir’auna so ŋun nyɛ bandi- lana
Bana n-nyɛ ban kpahi yεɣi tariga tiŋgbana ni
Ka bɛ zooi tuumbiɛri tumbu di puuni
Ka a Duuma kpaai azaaba balibu m-bahi bɛ zuɣu
Achiika! A Duuma nyɛla Ŋun pa nina yuunda
A nya ninsala, o Duuma yi dahimmi o ka tibgi o, ka niŋ o ni’ima shɛli, o yɛrimi: “Achiika! N Duuma shiri tibgi ma.”
Amaa! O yi ti dahimmi o ka chɛ ka bɛhigu kpɛm n-ti o, o yɛri mi: “N Duuma filim ma.”
Haifa! Chɛli gba! Yi bi tibgirila kpibga
Yi mi bi kpaŋsiri ni nandana dihibu
Ka yi diri fali liɣiri dibu din zooi
Ka yi lahi yuri liɣiri yurlim din zooi
Haifa! Bɛ yi ti dam tiŋgbani dambu ni yɛlimaŋli
Ka a Duuma kana, ka Malaaikanim’ ti ʒe safu ni
Dindali ka bɛ yɛn ti zaŋ ʒahannama buɣum na, dindali ka ninsala yɛn ti teei, ka yapolo ka teebu yɛn niŋ o anfaani
Ka o yɛra: “M-baye, bo n-di niŋ ka n-daa daŋsi tuunsuma n Dunia ʒii puuni.”
Dindali maa, so n-kani yɛn tooi niŋ azaaba n-ti lahi paagi O
So mi n-kani yɛn ba bandi n-ti lahi paagi O
“Yaa nyini nyɛvuli shɛli din mali suhudoo
Labmi a Duuma (Naawuni) sani, ka nyɛla ŋun niŋ yɛda, ni bɛ ni niŋ so yɛda.”