54.The Moon

  1. Ka toe that watee teuka kiamat Buleun di langet taeu ka beukah
  2. Teuma di jih dum ‘oh jieu ayat Jipaleng ligat sira jipeugah Nyan keubit sihe teuka lom laju
  3. Jikkheun paleusu kon nibak Allah Peuturot napsu di jih dum meuhat Teuma ka teutap putosan Allah Bandum ka teutap putosan Tuhan
  4. Ubak awaknyan ka lheuh geupeugah Haba peutakot soe nyang buet dacha
  5. Hikeumat raya peunteng that leupah Teuma peuingat hana meuguna
  6. Bah meunan teuma di jih lam salah Uroe nyan teuka ureueng jak meuhoi Bandum geumeuhoi jak keunoe bagah Haro-hara that jinoe ka teuka
  7. Khuchu‘ dum mata teumakot leupah Teubiet lam uruek dum lagee daruet Ka meuruet atuet le han ban peugah
  8. Bak ureueng jihoi jiplueng meuree-ree Kaphe dum teuntee leupah that susah Jikheun le kaphe uroe nyan meuhat Tanyoe meukarat hanaban peugah
  9. Kawom Noh dilee nibak awak nyan Jikheun sulet nyan peue nyang Noh peugah Hamba Kamoe nyan jikheun ka gila Bek le that haba jiyue top babah
  10. Teuma geulakee ubak Po gopnyan Neubri beu meunang lon nyoe ka kalah
  11. Kamoe peuhah treuk dum pinto langet Te raya that-that laju meuruah
  12. Bandum mata ie nyang na di bumoe Teupanca jinoe meulimpah-limpah le nyang di langet ngon nyang di bumoe Meusapat jinoe le han ban peugah Jeut treuk keu tophan teuma raya that Kheundak Hadharat han ek soe teugah
  13. U dalam kapai meupeuek gopnyan Papeun ngon labang ka meurok sudah
  14. Teuma meujaga ngon mata Kamoe Jijak kapai nyoe teuma le bagah Meunan keuh balah meubri keu gopnyan Nyang geuba iman deungon ikheulah Teuma jikaphe peue nyang gopnyan ba
  15. Jeut treuk keu tanda nyan Kamoe keubah Teuma na soe cok nyan keu peuingat
  16. Pakriban azeub keu jih Lon balah Nyan keuh dum ka troh nyang geupeuingat
  17. Qur'an pih that Kamoe peumudah Jeut nyan keu dike ingat keu Tuhan Teuma na soe nyan jitueng phaedah
  18. Meunoe pih sulet jipeugah le ‘Ad Pakriban azeub keu jih Lon balah Nyan keuh dum ka troh nyang geupeuingat
  19. Angen guncang that meukirem bagah Bak uroe ħahas keu jih ceulaka Buet angen raya guncang that leupah
  20. Jibot jibapo dum manusia Meutimpa-timpa mate dum reubah Sang bak kureuma reubah dum teubot
  21. Pakriban azeub keu jih Lon balah Nyoe keuh dum ka troh nyang geupeuingat
  22. Qur'an pih that Kamoe peumudah Jeut nyan keu dike ingat keu Tuhan Teuma na soe nyan jitueng phaedah
  23. Meunan pih Tsamud jipeugah sulet Haba peuingat jikheun beurakah
  24. Jikheun peue tanyoe tajak ikot jih Geutanyoe ngon jih kon saban leupah Jih sidroe insan lam kawan tanyoe Taikot jih nyoe sisat ngon salah Pungo that tanyoe nyang taikot jih
  25. Ek mungken bak jih geujok risalah Lam kawan tanyoe kon le soe laen Sulet mbong jih nyan peue jijak peugah
  26. Singoh jiteupue watee geubangket Si mbong ngon sulet raya beurakah
  27. Meukirem unta ujian keu jih ; Taluem treuk buet jih pakriban ulah Tasaba taeu pakriban buet jih
  28. Lom takheun bak ie beu jikeubah Nyang ladom keu jih ladom keu unta Jijep dum rata meusiblah-siblah
  29. Jihoi treuk rakan jiyue top unta
  30. Pakri jirasa azeub Lon balah Nyoe keuh dum ka troh nyang geupeuingat
  31. Geulanteue meuhat meukirem bagah Sigo grum jitak jih le geulanteue Abeh meusiseue mate dum reubah Lagee naleueng tho bandum ka teupat
  32. Qur'an pih that Kamoe peumudah Jeut nyan keu dike ingat keu Tuhan Teuma na soe nyan jitueng phaedah
  33. Kawom Nabi Luth pih jikheun sulet Haba peuingat jikheun beurakah
  34. Kamoe rhom treuk jih dum deungon batee Abeh treuk pade mate dum reubah Ahli Nabi Luth meukeubah mantong Bak akhe malam dum Kamoe peuglah
  35. Nikmat bak Kamoe keu soe nyang chuko Sidumnan keuh le nyang Kamoe balah
  36. Geupeuingat jih keu azeub Kamoe Tapi awak nyoe chok jih dum leupah Han jitem pateh ‘oh geupeuingat
  37. Jamee geuh jeh pat di jih jipeugah Tabri keu Kamoe nyan jamee gata Meupleu treuk mata jih bandua blah Rasa treuk jinoe mata keuh buta Azeub Lon sit ka dilee geupeugah
  38. ‘Oh beungoh singoh teuka le azeub Keu jih nyan teutap hana soe peuglah
  39. Rasa treuk jinoe pakri azeub Lon Dilee atra nyan sit ka geupeugah Bandum nyan dilee ka geupeuingat
  40. Qur'an pih that Kamoe peumudah Jeut nyan keu dike ingat keu Tuhan Teuma na soe nyan jitueng phaedah
  41. Kawom Peuraʻun pih geupeuingat
  42. Jikheun sulet that peue nyang geupeugah Ayat Kamoe dum jipeugah sulet Meu Kamoe azeub treuk jih dum bagah Mangat jiteupue Kamoe Perkasa Keubit kuasa hana ban peugah
  43. Boh nyan dum kaphe nyang rakan gata Ek got jih teuma hana meusalah Ek leubeh got jih nibak ureueng nyoe Gata pih dum nyoe peue na soe peuglah Han keunong azeub gata ka teuntee Lam kitab dilee peue na geupeugah
  44. Atawa jìkheun dum le awaknyan Kamoe nyoe meunang han sagai kalah
  45. Bandum jih talo jiplueng jisurot
  46. Tapi kiamat cit troh le bagah Ka Iheuh geujanji bak jih kiamat Nyang leubeh dahcat ngon phet sileupah
  47. Awak meudacha nyang dalam sisat Di jih dum teumpat lam apui mirah
  48. Uroe nyan geuhoi jih lam nuraka Geupeugom muka jih keunan bagah Karasa jinoe teupeh nuraka
  49. Bandum peukara ka meuboh batah Nyang Kamoe peujeut Kamoe boh kada
  50. Buet Kamoe teuma leupah that bagah Ek keumah dalam seukeujap mata
  51. Dum awak gata takalon sudah Padumna le jih meupeubinasa Teuma soe ek na nyang tueng phaedah
  52. Peue nyang jipubuet ka na lam kitab
  53. Bandum geusurat teuma geukeubah Ubit ngon rayok salah ngon beuna
  54. Soe nyang takwa nyan nyang meutuah Ureueng nyan bandum asoe churuga Ie krueng churuga harok teuh leupah
  55. Bak teumpat nyang jroh beuna bak Tuhan Kuasa Tuhan beuna ban peugah
Prev Next