51.The Winnowing Winds

  1. Demi angen kreuh jipho peurabe
  2. Awan meuteuntee ujeun jiruwah
  3. Demi dum kapai jijak mudah that
  4. Dum malaikat jak bagi tugah
  5. Keubit nyang janji geubri keu gata Leupah that beuna hana meusalah
  6. Geubalah amai pih keubit beuna
  7. Di langet teuma jalan le leupah
  8. Teuma dum gata le that meudawa
  9. Na nyang han suka deungo peurintah
  10. Awak nyang sulet keunong muruka
  11. Jinom lam paya jahe sileupah
  12. Jitanyong pajan uroe kiamat
  13. Uroe nyan meuhat azeub that payah Geupeulop jih dum dalam nuraka
  14. Jinoe karasa pakri geubalah Dilee kalakee beu rijang teuka Nyoe keuh ka teuka azeub that leupah
  15. Keubit roe teuma ureueng takwa Dalam churuga keubon nyan indah Mata ie sinan pih jeureuengeh that
  16. Keu gopnyan meuhat Neubri le Allah Dumpeue nyang Neubri uleh Po gopnyan Geucok bandum nyan seunang sileupah Amai geuh dilee got that amalan
  17. ‘Oh teungoh malam geubeudoh bagah Nit that nyang geueh bak watee malam
  18. Geulakee ampon dacha bak Allah Bak watee saho geubeudoh laju Ampon Tuhanku sibarang salah
  19. Arta gopnyan sit hak gop laen Keu ureueng gasien lakee seudeukah Nyang hana lakee pih geujok ligat Ureueng gasien that sayang sileupah
  20. Teuma di bumoe sit le that tanda Soe nyang peucaya yakin keu Allah
  21. Peue hana taeu lom bak droe gata
  22. Raseuki gata pih Tuhan keubah Di langet sideh Neubri raseuki Lom nyang ka janji Neubri le Allah
  23. Demi Po langet deungon Po bumoe Janji Tuhan nyoe beuna that leupah Saban ngon beuna narit dum gata Nyang tabicara nyang hana salah
  24. Peue na troh haba keunan bak gata Jamee nyan teuka keudeh geulangkah Ubak Ibrahim jamee nyan teuka Jamee mulia surohan Allah
  25. ‘Oh ban geutamong ubak Ibrahim Geumeubri saleum teuma le bagah Geujaweub saleum hana lon turi
  26. Tamong bak ahli teuma geupeugah Jeh aneuk leumo saboh nyang teumbon
  27. Tabri makanan jamee troh langkah Pakon dum hana tacok makanan
  28. Ibrahim yoh nyan teumakot leupah Han peue tatakot kheun dum ureueng nyan Kamoe ba peusan sideh bak Allah Geupeugah treuk na haba gembira Lahe aneukda sidroe nyang ceudah
  29. Teuma peurumoh nabi Ibrahim Oh geudeungo nyan karu geuh leupah Geupoh-poh muka geukheun peue haba Lon nyoe ka tuha peue nyan tapeugah Lon nyoe ka tuha lom pih lon male
  30. (Jamee dum kheun le hana peue susah Meunan ka Neukheun le Tuhan gata That bijaksana peue nyang Neupeugah JUZ 27) Allah Taʻala dumpeue Neuteupue Hana meusapeue pih na meuilah
  31. Ibrahim tanyong teuma peue haba Jamee mulia ho tameulangkah
  32. Geukheun dum kamoe Neuyue jak keudeh Bak kawom paleh raya that salah
  33. Ngon batee tanoh Kamoe rhom dum jih
  34. Ka na tanda jih Neubri le Allah Bandum batee nyan ka na meutanda Nibak Po gata keu awak salah
  35. Kamoe peuteubiet ureueng meuiman Bandum di sinan bek keunong tulah
  36. Cit saboh rumoh nyang na Iseulam Laen nibak nyan bandum si jadah
  37. Kamoe keubah treuk tanda di sinan Keu ureueng mukmin geutueng phaedah Ureueng nyang takot akan geuazeub Keubit peudeh that teuma geubalah
  38. Teuma lom haba keu Nabi Musa Kamoe yue teuka keudeh geulangkah Ubak Peuraʻun geuba ngon tanda Nyang leupah nyata bak jih geupeugah
  39. Teuma jipaleng han jitem pateh Ngon dum rakyat jih jikheun beurakah Jikheun nyan sihe adak han gila
  40. Meupeubinasa treuk jih dum bagah Jih ngon teuntra jih meutiek lam laot Keu umpeun eungkot sinan meukeubah Jeut jih geucaci lom pih binasa
  41. Meunan pih teuma si ‘Ad seurakah Angen raya that meukirem keu jih
  42. Abeh bandum jih anco ngon bicah Peue nyang meurimbah bandum jisama
  43. Di Tsamud teuma pih seunang leupah Meuseunang-seunang bandum keuh siat Meunan ibarat bak jih geupeugah
  44. Peurintah Tuhan jidarohaka Geulanteue teuka jieu trang leupah Jitak jih bandum sinan meugule
  45. Hana beudoh le meuseumpom reubah Han ek soe tulong bandum binasa
  46. Kawom Noh teuma pasek that leupah Ĉ Bandum jih dilee abeh binasa Hana kuasa jilawan Allah
  47. Meupeugot langet ngon that kuasa Takalon nyata Kamoe peuluah
  48. Kamoe leung bumoe pih lagee tika Seunang that gata sinan meukeubah
  49. Meujudo-judo meupeujeut dumpeue Mangat gata nyoe tatueng phaedah Mangat taingat kuasa Tuhan
  50. Taplueng bak Tuhan jinoe le bagah Neuyue jak lon nyoe bak gata meuhat Neuyue peuingat nyata that leupah
  51. Teuma bek tacok Tuhan nyang laen Tapeugah Tuhan nyang bukon Allah Neuyue jak lon nyoe bak gata meuhat Neuyue peuingat nyata that leupah
  52. Teuma sit meunan sabe dileekon Keu rasul Tuhan bandum jibantah Jipeugah sihe atawa gila
  53. Peue jih seureuta peusan jipeugah Tapi jih kawom nyang darohaka
  54. Bek that di gata jih nyan tapapah Bah jih di sinan jidarohaka Teuma di gata han jeut keu susah Han jeut geucaci peue nyang buet gata
  55. Peuingat saja gata ka sudah Ureueng meuiman meu tapeuingat Raya munaphaʻat hanaban peugah
  56. Lon peujeut dum jen ngon manusia Mangat Lon saja di jih jiseumah
  57. Di Lon kon napsu bak jih raseuki Lom kon nak jibri makanan mudah Makanan keu Lon hana peue jibri
  58. Nyang bri raseuki cit sidroe Allah Tuhan nyang teuga nyang kong ban baja
  59. Nyang lalem teùma meuhat Neubalah Sabab na bagi jih lagee ngon jih Bandum rakan jih nyang pubuet salah Han peue jilakee beu rijang Lon bri
  60. Teuma si kaphe ceulaka leupah Lagee geupeugah yoh geumeujanji Sinan keuh meuri keu jih meubalah
Prev Next