43.Ornaments of gold

  1. Ha Mim Tuhan nyang teupue meukeusud ayat Sabab Hadharat hana Neupeugah
  2. Demi kitab nyoe keubit nyata that
  3. Lam bahsa Arab Qur’an meuulah Mangat jeut tapham ngon akai sehat
  4. Lam ummul kitab dilee meukeubah Sideh bak Kamoe dilee manyang that Ngon le hikeumat sinan meupeugah
  5. Peue bek meupeutron teuma bak gata Sabab dum gata kawom nyang salah
  6. Padum le Nabi ka Kamoe kirem Bak kawom jameun masa nyang sudah
  7. ‘Oh ban troh Nabi ubak awaknyan Jipeukhem gopnyan jikheun beurakah
  8. Meupeubinasa treuk nyang juara Nyang leupah teuga dalam buet salah Haba ngon miseu dum keu awaknyan Ka lheuh uroenyan dum Kamoe peugah
  9. Meunyo tatanyong soe peujeut langet Ngon bumoe meuhat lagee nyoe luah Meuhat dum jikheun Tuhan nyang peujeut Kuasa Neuh that Perkasa leupah Neuteupue dumpeue hana nyang silap
  10. Bumoe nyo meuhat lagee peuratah Neupeujeut bumoe keu gata bandum Sang tika teulheung raya ngon luah Neupeugot jalan dum dalam bumoe Mangat troh sampoe ho tameulangkah
  11. Ujeun di langet Neupeutron bacut Kamoe peuudep nanggroe tho leupah Gata pih meunan dudoe geubangket ‘Oh Iheuh padum trep sinan geukeubah
  12. Neupeujeut dumpeue meupasang-pasang Kapai jak tajam di laot luah Binatang ternak Neupeujuet saban Jeut cit keu keundraan ho tameulangkah
  13. Meu ka Iheuh taduek ateuh rueng keundraan Taingat rijang keu nikmat Allah Nikmat Po gata ‘oh taduek takheun Suci that Tuhan nyang Maha Murah Neubri jeut meuduek ateuh keundraan nyoe Adak han kamoe ka jeut that susah
  14. Kamoe cit meuwoe ubak Po kamoe
  15. Teuma awaknyoe jipubuet ulah Na saboh bahgi peuneujeut Tuhan Jijok keu Tuhan meunan jipeugah Insan nyoe hana jiingat jasa Jikaphe teuma nyata that leupah I
  16. Ek patot Tuhan na aneuk inong Laen nyang agam bandum Neukeubah Neujok nyang agam bandum keu gata Oh lheuh Neucipta makheuluk Allah
  17. Meunyo na aneuk di jih nyang inong Lagee keu Tuhan ban lheuh jipeugah Mukajih itam beungeh jih that-that I
  18. Peue meunan sipheut awak nyang gagah Takalon cantek bak ngui pakaian Han ek jipeutrang watee geubantah
  19. Malaikat dum jipeugah inong Nyan hamba Tuhan nyang Maha Murah Peue na jikalon watee Neupeujeut Uleh Hadharat jeutnyan jipeugah Bandum geutuleh peue nyang jikheun nyan Akan Neutanyong dudoe le Allah
  20. Jikheun meunyo ka kheundak bak Tuhan Bandum ureueng nyan han kamoe seumah Hana jiteupue di jih meusapeue Meuka jigo-go mantong jipeugah
  21. Peue na Kamoe bri keu jihnyan kitab Keunan jimumat masa nyang sudah
  22. Tapi jih jikheun kamoe meukalon Yah kamoe bandum jkeunan geuseumah Kamoe meuikot peutunyok gopnyan
  23. Dileekon meunan cit dum jipeugah Pat-pat nyang nanggroe meukirem rasul Han jitem kabui bandum jibantah Awak nyang mewah dum jikheun meunoe Dilee yah kamoe meunan geupeugah Kamoe meuikot agama gopnyan
  24. Kheun rasul yohnyan kawom meutuah Boh meunyo lon bri tunyok keu gata Nyang leubeh nyata nibak buet ayah Jikheun di kamoe hana peue kheun le Sit ka meukaphe peue nyang tapeugah
  25. Kamoe bri azeub treuk keu awaknyan Takalon keuh nyan peue na jikeubah Pakri akibat keu soe han pateh Bandum jih abeh jinoe ka sudah
  26. Ibrahim geukheun bak ayah gopnyan Ngon kawom gopnyan meunoe geupeugah Peue nyang taseumah dum hana roh lon
  27. Lon seumah di lon sit sidroe Allah Tuhanku sidroe keuh nyang peujeut lon Neupeutunyok lon bek roh buet salah
  28. Nyan keuh geukeubah narit nyang keukai Beu jeut keu beukai soe nyang meutuah Mudah-mudahan jigisa keunan Dilikot gopnyan dum hamba Allah
  29. Tapi ka lon bri dum seunang keu jih Deungon yah-yah jih dilee ka sudah NINSEA TON Dax Jin nyang Keuvcnaran Rasul jak peutrang bandum peurintah
  30. ‘Oh ban troh geuba bak jih nyang beuna Atranyoe teuma sihe jipeugah Kamoe meukaphe hana meupateh
  31. Pakon han keudeh mantong geukeubah Bak ureueng rayok bak dua nanggroe Keunan Quran nyoe geuyue jak peugah
  32. Peue jih nyang bagi rahmat Po gata Jibagi dua meusiblah-siblah Kamoe nyang bagi keu jih dum teuma Udep lam donya keu jih meupisah Meupeuek pangkat keu jihnyan ladom Mangat nyang ladom jipandang rendah Jiyue barangpeue ngon jih nyang hina Rahmat Po gata teuma nyang indah Nibak areuta nyang jih peusapat Leubeh got rahmat Neubri le Allah
  33. Adak kon napsu keu bandum insan $ Beu saboh jalan bek roh lam salah Teuntee Kamoe bri keu awak kaphe Rumoh meuuke nyanggot that leupah Bubong jih pirak rinyeun rot jiek
  34. Pinto meulirek lom ngon peuratah Meusadeu jidong bak peuratah nyan
  35. Lom perhiasan nyang indah-indah ; Bandumnyan seunang lam udep donya Akhirat teuma nyan laen ulah Seunang akhirat keu soe nyang takwa Nibak Po gata sideh Neukeubah
  36. Barangsoe buta han ingat Tuhan Kamoe bri rakan chetan seurakah Kamoe bri keu ngon jih di jih chetan
  37. Mangat jih jitham bak jalan Allah Han jibri jak jih bak jalan teupat Jisangka meuhat jalan got leupah
  38. Hingga ‘oh troh jih teuma bak Kamoe Beu jarak keuh nyoe jikheun le bagah Antara teubiet ngon jìlop uroe Adak jeut dumnoe jarak lon ngon kah Keubit roe chetan rakan jeuheut that
  39. Tan le munaphaʻat meunyesai teulah Hana guna le meunyesai gata Lalem that gata masa nyang sudah Uroe nyoe sapat teuh dalam azeub
  40. Peue ek tamarit ngon ureueng salah Peue ureueng tuloe ek deuh jideungo Bak ureueng buta jalan tapeugah Ngon ureueng sisat nyang leupah nyata
  41. Kadang di gata tawoe bak Allah Kamoe peumate kadang phon gata Jihnyan meusiksa dudoe that leupah
  42. Got meupeuleumah pih ubak gata Janjimeuh nyang ka masa nyang sudah Barangban Kamoe sit that kuasa
  43. Teuma di gata beu kong that leupah Peue nyang geuwahi keunan bak gata Tamat beu teuga bek sagai ubah Keubit roe gata bak jalan teupat
  44. Dike teuh meuhat taingat Allah Dike keu gata ngon kawom gata Neutänyong teuma dudoe le Allah
  45. Tatanyeng rasul sigohlom gata Peue na meuyue ba Tuhan nyang salah Na meuyue seumah Tuhan nyang laen Nyang macam-macam nyang bukon Allah
  46. Ka Kamoe kirem yoh dilee Musa Keudeh geujakba ngon ayat Allah Ubak Peureu‘ʻun ngon kawom jihnyoe Ngon ayat Kamoe keunan geulangkah Geukheun lon rasul Tuhan Po gata
  47. ‘Oh troh geuh keunan jikhem meuhah-hah Jiulok-ulok dum ayat Kamoe
  48. Meubagoe-bagoe Kamoe peuleumah Meupeudeuh bak jih padum muʻjizat Maken raya that Kamoe peuleumah Maken le ayat maken rayok lom Di jih han cit lom pateh peurintah Kamoe bri azeub treuk teuma keu jih Kadang jiwoe jih nibak buet salah
  49. Jikheun treuk dum jih hai tukang sihe Di kamoe han le meupubuet salah Talakee duʻa bak Tuhan gata Janji ngon gata kamoe Neupeuglah
  50. Kamoe peuglah treuk jih nibak azeub ‘Oh Iheuhnyan ligat jibalek ulah Hana tingat jih le keu janji jih
  51. Peureaʻun dengki jeuheut that leupah Jikheun bak kawom jih kon lon raja Keurajeun raya nanggroe nyang meugah Peue kon lon nyang po keurajeun Meuse Te krueng dum ile di yup lon boh-bah Peue han deuh taeu le gata bandum
  52. Boh kon leubeh lon ngon jih nyang rendah Karap-rap han jeut di jih jimarit Jihnyan sit keubit hina sileupah
  53. Pakon han gleung meuh keu jih geupeusok Malaikat troh pih lom geulangkah Troh malaikat geujak peungon jih
  54. Teuma kawomjih ek jipeurintah Jipateh laju peue kheun Peuraʻun Keubit kawomnyan pasek that leupah
  55. ‘Oh beungeh Kamoe teuma keu jih dum Meu Kamoe hukom treuk jih dum bagah Kamoe peukaram treuk jih lam laot
  56. Jeut jih geuseubot geupeugah-peugah Jeut jih ibarat keu ureueng dudoe Nyang jeut lagee nyoe sabab ka salah
  57. ‘Oh ban geupeugah aneuk Mariyam Jeut keu teuladan kuasa Allah Kawom gata dum ka jeut keu karu
  58. Jikheun dum laju teuma jipeugah Tuhan geutanyoe dum got nibak nyan Meukeusud jihnyan sit keu jibantah Bandum jih sit nyan kawom bantahan
  59. Kon laen gopnyan cit hamba Allah Kamoe bri nikmat teuma keu gopnyan Jeut keu misalan nyang jroh sileupah Jeut keu ibarat Bani israil
  60. Gata pih Neubri ban nyang hʻeut Allah Meu Kamoe kheundak keugata meuhat Ngon malaikat meugantoe bagah Meugantoe gata ngon malaikat Di bumoe meuhat jeut keu khaliphah
  61. Jeut keu ‘eleumee teuntang kiamat Gata dum meuhat bek chok sileupah Taikot treuk lon nyoe jalan teupat
  62. Chetan nyang laknat bek ek jiteugah Keubit roe chetan musoh nyata that Gata bak sisat jiyue meulangkah
  63. ‘Oh ban troh Isa geuba ngon ayat Lon ba hikeumah teuma geupeugah Lom lon jak peutrang keunoe bak gata Nyang tameudawa mangat bek salah Teuma takwa gata keu Tuhan Tataʻat keu lon Neuyue le Allah
  64. Allah Tuhanlon ngon Tuhan gata Droeneuhnyan saja nyang beu taseumah Jalan nyoe keuh nyang jalan nyang teupat
  65. Han jitem pakat teuma jibantah Jipeudong dawa sabe keudroe jih Ceulaka treuk jih nyang lalem leupah Keu jihnyan azeub uroe kiamat Uroe peudeh that hanaban peugah
  66. Peue laen jipren meu kon Kiamat Hana jan siat cit troh le bagah Hana meujithee ka troh kiamat
  67. Ngon rakan jih that musoh sileupah Meumusoh-musoh sabe keudroe-droe Meu kon ureueng nyoe takwa keu Allah
  68. Ho ka dum gata hamba-hamba Lon Uroenyoe bandum gata ka leupah Hana peue takot hana susah le
  69. Iman lam ate keu ayat Allah Soe nyang meuiman keu ayat Kamoe Lom pih bak Kamoe droejih meunyerah
  70. Jak tamong laju ngon judo gata Dalam churuga seunang that leupah Bandum teuh seunang dalam churuga
  71. Keunan troh geuba pingan deungon glah Pingan meuh ngon glah ka na soe idang Bandum ureueng nyan ladat sileupah Peue napsu ate ladat di mata Bandum seudia han ek tapeugah Lom bandum gata keukai di sinan
  72. Pusaka teuh nyan churuga indah c Keu gata bandum geubri pusaka Balah usaha masa nyang sudah
  73. Boh kayee le that sinan keu gata Tapajoh sigra ladat that leupah
  74. Awak nyang salah keukai lam azeub Keu jihnyan teumpat nuraka juah
  75. Putoh asa bit di jih lam azeub Hana meusiat pih jih geupeuglah
  76. Teuma kon Kamoe nyang elanya jih Tapi keudroe jih lalem that leupah
  77. Jikheun hai Malek han ek meutheun le Tayue poh mate kamoe bak Allah Geujaweub di kah teutap lagee nyan
  78. Kon ka watee nyan dum Kamoe peugah c Haba nyang beuna meuba bak gata Tapi dum gata beunci teuh leupah Beunci that gata keupeue nyang beuna
  79. Jipakat teuma lom bak buet salah Jipakat dum jih saboh rencana Kamoe rencana leubeh lom ceudah
  80. Hana meudeunge rahsia jihnyan jisangka meunan kaphe seurakah Nyang jimeus‘ah-s‘ah jipeugot pakat Bandum geusurat hana meuilah Bandum geutuleh le Rasul Kamoe Nyang jih pubuet nyoe beuna ngon salah
  81. Takheun meunyoe bit na aneuk Tuhan Lon keuh ureueng phon keunan lon seumah
  82. Maha suci that Po langet bumoe Po ‘arasy lom nyoe ban nyang jih peugah
  83. Bah jilop keunan jimaen-maen ‘Oh troh uroenyan meunyesai teulah Akan meureumpok jih ngon uroenyan Ka janji Tuhan dilee Neupeugah
  84. Sideh di langet Droeneuh nyan Tuhan Di bumoe meunan hana meuubah That bijaksana dumpeue Neuteupue Hana meusapeue pih na meuilah
  85. Maha suci that Tuhanku sidroe Langet ngon bumoe sit milek Allah Keurajeun langet keurajeun bumoe Bandum ngon asoe Droeneuh peurintah Pajan kiamat Droeneuh nyang teupue Bandum gata nyoe tawoe bak Allah
  86. Nyang jikheun Tuhan dum le awaknyan Chuphevuʻat pih tan keu jih Neukeubah Han jeut chupheuʻat bandum awaknyan Nyang jikheun Tuhan nyang bukon Allah Meulengkan ureueng nyang saksi beuna Geupubuet teuma bandum peurintah Nyang jeut keu saksi bak keubenaran ‘Eleumee gopnyan Neubri le Allah
  87. Meunyo tatanyong ubak awaknyan Soe peujeut jihnyan sit jikheun Allah Pakon sit di jih ek jipeupaleng
  88. Geukheun ya Tuhan nyang Maha Murah Kawomnyoe bandum han jimeuiman
  89. Bah keu jih meunan bek that tapapah Takheun seulamat mantong keu jih nyoe Jiteupue dudoe akibat salah
Prev Next