41.Explained in detail

  1. HaMim Tuhan nyang teupue meukeusud ayat Sabab Hadharat hana Neupeugah
  2. Neupeutron kitab sideh bak Tuhan Meusipheut Rahman nyang Maha Murah Tuhanku sidroe geumaseh that-that
  3. Nyoe keuh nyang kitab nyang trang sileupah Ayat Neupeutrang di dalam kitab Lam bahsa Arab Qur'an Neupeugah Kawom nyang teupue jitueng munaphaʻat
  4. Haba peuingat beuna ngon salah Haba peugalak haba peutakot Teuma nyang surot pih le that leupah Jipaleng laju watee jideungo Han ek jideungo di jih jipeugah
  5. Jikheun di kamoe atemeuh teutop Han ek meuikot peue nyang tapeugah Geulinyueng kamoe pih ka meusumpai Han jitem sagai deungo peurintah Antara kamoe lom deungon gata Binteh meusangga han ek tapeuhah Pubuet di gata ban nyang hʻeut gata Kamoe keurija pih ban nyang mudah Kamoe meupubeut ban nyang h‘eut kamoe
  6. Takheun di lon nyoe meulon seumeugah Lon manusia sit lagee gata Teuma Neuyue ba wahyu le Allah Keu bandum gata Neuwahyu bak lon Tuhan gata dum cit sidroe Allah Teuma beu teutap keuh ate gata Bek na meutuka iman meuubah Talakee ampon ubak Droeneuh nyan Ceulaka yohnyan keu awak salah Jipeucharikat Tuhan ngon laen
  7. Lom pih han jitem bayeue seudeukah Han jitem bayeue seudeukah wajeb Han jibri zakeuet keu hamba Allah Lom pih jikaphe akan akhirat Hana akhirat di jih jipeugah
  8. Ureueng meuiman lom geupubuet got Pahla raya that Neubri le Allah Hana tom putoh keu gopnyan pahla
  9. Takheun peue gata kaphe keu Allah Pakon takaphe gata keu Tuhan Kuasa Tuhan hanaban peugah Neupeujeut bumoe lam dua uroe Di gata dumnyoe laen tapeugah Tapeugah dum le Tuhan nyang laen Padahai Tuhan cit sidroe Allah Nyan keuh nyang Tuhan nyang Po dum alam
  10. Neupeujeut gunong raya ngon meugah Neubri beureukat lom bak dum gunong Le that makan sinan Neukeubah Nyan pih Neukada dalam peut uroe Saban geutanyoe tatueng phaedah
  11. Tuhan Neupeukeu teuma u langet Mantong meuasap gohlom got sudah Neukheun bak langet deungon bak bumoe Boh jak leh keunoe bandua di kah Kajak ngon seunag got pih terpaksa Jiseuot lanja seunang that leupah Ngon seunang ate kamoe meuteuka
  12. Neupeugot lanja treuk jih le Allah Tujoh boh langet Neupeugot jinoe Lam dua uroe sagai ka sudah Teuma neuwahi bak bandum langet Peue-peue nyang patot urusan di kah Kamoe peuindah bak langet nyang toe Lampu sinaroe hu meujeureulah Lom meuplihara meupeugot kada Keubit perkasa Kamoe that leupah Bandum meuteupeue sigala rupa
  13. Takheun le gata meunyo jibantah i Meunyo jipaleng jih tapeuingat Dilee kawom ‘Ad binasa sudah Bak ‘Ad ngon Tsamud teuka geulanteu Keu jih pih meunoe hana meuubah
  14. Awaknyan dilee ‘oh teuka rasul 3 Han jitem kabui peue nyang geupeugah Di keu di likot jih rasul teuka Allah Taʻala dum geuyue seumah Bek seumah laen meulengkan Tuhan Jikheun le yohnyan peue tajak peugah Meunyo Neukheundak uleh Hadharat Sit malaikat Neupeutron bagah Meunyo sit gata Neukirem keunoe Meukaphe kamoe peue nyang tapeugah
  15. Awak ‘Ad teuma leupah teukabo Jipeucot baho di bumoe Allah Hana hak di jih jikheun lom teuma z Soe nyang that teuga teuma tapeugah si Peue hana jieu Tuhan peujeut jih Leubeh nibak jih teuga that leupah Biek meunan di jih keu ayat Kamoe Jiungki dum nyoe jikheun nyan salah
  16. Kamoe kirem treuk angen nyang kreuh that Jeut jih meularat hanaban peugah 8: Na padum uroe jih dum meularat c Jirasa azeub ayeb that leupah i$ Ayeb that azeub lam udep donya Akhirat teuma han ek tapeugah Leubeh that ayeb azeub akhirat Hana meusapat pih soe ek peuglah
  17. Teuma si Tsamud Kamoe peutunyok Han jitueng jicok di jih nyang salah Galak keu buta jih nibak teubleut Teuka treuk azeub hina sileupah Geulanteu azeub keu jih dum teuka
  18. Meupeuglah sigra ureueng meutuah Ureueng meuiman leupah bak bala Sabab takwa gopnyan keu Allah
  19. Ureueng nyan teuma dum geupeusapat Musoh Hadharat lam apui mirah Geubagì-bagi jih lam nuraka
  20. Saksi dum jiba keu jih jipeugah y Geulinyueng mata jih jiek saksi s Han jeut jiungki jipubuet salah Kulet bak tuboh jih pih jimarit Peue nyang jipubuet bandum jipeugah
  21. Jikheun bak kulet jih pakon meunoe Nyang salah kamoe dum kajak peugah Jiseuot kulet jeut kamoe marit Ka Neuyue marit kamoe le Allah Tuhan kuasa Neuh Neuyue marit Dumpeue jimarit ‘oh Neupeurintah Tuhan nyang peujeut gata phon dilee Tawoe meuteuntee bandum bak Allah
  22. Peue-peue nyang tatop hana le daya “$ Dum salah gata ka beh jipeuhah Geulinyueng mata kulet keu saksi Takeumeung ungki hana le hilah Tasangka Tuhan hana Neuteupue Tapubuet bateu dum le sileupah
  23. Meunan tasangka keu Tuhan gata Ka keuh binasa gata Neubalah Meujeut treuk gata raya that rugoe
  24. Saba treuk jinoe dang-dang peurintah \ Meunyo jisaba dalam buet dacha Dalam nuraka dum jih geukeubah Meunyo jilakee bak gata ampon Han geupeuampon raya that salah
  25. Kamoe bri rakan teuma dum keu jih i Jikheun treuk buet jih nyan got sileupah i Buet nyang di keu jih got dilikot jih 5 Bandum got bak jih nyan hana salah Meu hak treuk keu jih putosan Tuhan Bak jen ngon insan nyang sudah-sudah Putosan Tuhan sit ka meuteuntee Rugoe meuribee jih han ban peugah
  26. Bek kajak deungo Qur'an jihnyoe i Meunan keuh bagoe kaphe jipeugah ; Kasurak mantong watee kadeungo Bek deuh kadeungo bek jeut keu susah Ngon nyan meunang keuh talo awaknyan
  27. Rasa treuk yohnyan azeub that leupah Kamoe peurasa azeub keu kaphe Hana guna le meunyesai teulah Leubeh brok that lom nibak jih pubuet Meunan keuh azeub keu jih meubalah
  28. Meunan keuh sitree Allah Taʻala Dalam nuraka bandum Neukeubah Keukai jih sinan hana teubiet le Sabab jiungki keu ayat Allah Balah jiungki keu ayat Kamoe
  29. Kaphe dum jinoe teuma jipeugah Dua jeuneh nyang peusisat kamoe Hai Tuhan kamoe Neubri beuleumah Jen deungon insan Neupeuleumah roe Yup tapak gaki kamoe meukeubah Kamoe meugidong jih u yup that-that Kamoe dum sisat jih peugot ulah
  30. Teuma soe nyang kheun Po kamoe Tuhan / Jimeudong sinan bak jalan Allah Malaikat tron dum bak ureueng nyan Geukheun bak gopnyan bek susah-susah Takot ngon gundah bek na bak gata Teumpat dum gata churuga indah Teutap teuh sinan meusuka-suka Janji ngon gata jinoe Neubalah
  31. Kamoe nyoe bandum keu rakan gata Lam udep donya dilee phon sudah Meunan pih jinoe troh u akhirat Peue-peue nyang hajat teuh ka Neukeubah Peue nyang talakee sit na le laju
  32. Nikmat Tuhanku Neubri hadiyah Tuhanku sidroe Maha Pengampon Lagi pih Tuhan Maha Pemurah
  33. Soe na nyang laen leubeh got narit Meu kon nyang marit geumeuhoi Allah Geupubuet nyang got lom geukheun keudroe Ka lon peujok droe di lon bak Allah Ulon nyoe keuh nyang ureueng Iseulam
  34. Nyang got han saban deungon nyang salah Nyang got ngon jeuheut han sagai saban Tamaba rakan beugot tapeugah Meunyo tamarit mameh suara Musoh ngon gata han jadeh marah Musoh barokon ka jeut keu rakan Kon le jih lawan ka rakan leupah
  35. Nyang ek teumee nyan ureueng nyang saba Nyang raya laba Neubri le Allah
  36. Meunyo jidaya gata le chetan Talakee lindong laju bak Allah Tuhan Neudeungo lom that Neuteupue Hana meusapeue pih na meuilah
  37. Tanda kuasa lom Tuhan sidroe Malam ngon uroe han tom meuubah Mata uroe lom teuma ngon buleun Teuma bek takheun jihnyan taseumah Bek tasujud bak mata uroe Buleun pih meunoe peuneujeut Allah Keudeh tasujud bak Tuhan sidroe Nyang peujeut jihnyoe deungon blah bicah Meunyo bit gata taseumah Tuhan
  38. Bek sagai rakan teukabo leupah Meunyo teukabo jih dum awaknyan Nyang toe ngon Tuhan bandum meunyerah Geukheun teuseubeh malam ngon uroe Tuhan geupujoe hana tom leulah
  39. Lom saboh tanda kuasa Tuhan Bumoe takalon ka tho sileupah ‘Oh meubri ujeun meugr‘ak jih udep Bandum peunyaket gadoh le bagah Meunyo bumoe nyan ek Neupeuudep Ek keuh Neubangket bandum le Allah Ureueng nyang mate bandum Neubangket Tuhan cit sabet kuasa leupah Ateuh barangpeue Tuhan kuasa
  40. Laen keunira nyang awak salah Nyang han tem pateh dum ayat Kamoe Bandum di Kamoe meuteupue sudah Hana nyang meusom dumpeue bak Kamoe Soe got awaknyoe ngon nyang meutuah Soe got nyang geutiek dalam nuraka Nibak soe nyang ka iman keu Allah Ureueng nyan aman uroe kiamat Pubuet treuk ligat peue nyang hʻ‘eut di kah Peue nyang tapubuet Neueu le Tuhan Meu sapeue pih tan nyang hana leumah
  41. Keubit ceulaka keu awak kaphe l ‘Oh teuka Zike bak jih jibantah Padahai Zike kitab mulia
  42. Hana tom teuka keunan nyang salah Dikeu dilikot jih tan nyang bateu Neupeutron keunoe sideh bak Allah That bijaksana hak that tapujoe Tuhanku sidroe nyang Maha Murah
  43. Peue nyang geupeugah keunan bak gata Yoh dilee pih ka bandum geupeugah Bak Rasul-rasul sigohlom gata Tuhan Po gata kuasa leupah Ek Neupeuampon lom ek Neusiksa Peudeh that rasa keu soe nyang salah
  44. Meunyo Neupeujeut teuma Qur'an Lam bahsa laen bandum meupeugah Teuntee jikheun sit pakon hana trang Ayat di dalam hana geucharah Nyang saboh laen nyang saboh Arab Pakri ek sapat meupisah-pisah Takheun nyoe milek urueng meuiman Peutunyok Tuhan nyang Maha Murah Lom jeut keu ubat Neubri le Tuhan Nyang han meuiman droejih nyang salah Ka jiboh sumpai lam geulinyueng jih Buta mata jih han sapeue leumah Tameuhoi jihnyan bak teumpat jioh Pajan keuh ek troh peue nyang tapeugah
  45. Dilee Kamoe bri kitab keu Musa Jipeudong dawa teuma jibantah Adak kon ka na putosan Tuhan Abeh awaknyan binasa sudah Di jih dalam chok ragu jih sit that
  46. (Ureueng pubuet got cit got Neubalah Meuwoe got keudroe jih dudoe teuma Meunan pih teuma nyang pubuet salah Ateuh droe jih sit meuwoe meularat Po gata meuhat ade that leupah JUZ 25) Han Neuelanya Tuhan keu hamba
  47. Kiamat teuka ‘eleumee Allah Pajan kiamat ʻeleumee Tuhan Boh kayee pajan ek jeut keu buah Aneuk lam kandong pajan keulua Bandum nyan juga ‘eleumee Allah Uroenyan geuhoi bandum awaknyan Ho ka dum Tuhan nyang gata seumah Tapeucharikat jihnyan dum ngon Lon Hoka jih dum nyan tacuba peugah Jiseuot bandum hana kamoe eu Meu na kamoe eu teuntee meupeugah
  48. Peue nyang dilee kon nyang jikheun Tuhan Nibak uroenyan hana le leumah Ka keuh jiyakin bandum awaknyan Hana le jalan droeteuh tapeuglah
  49. Hana roe bosan dum manusia Jilakee duʻa bak got that leupah ‘Oh teuka nyang brok jih putoh asa Hana le daya meunan jipeugah
  50. Meunyoe Kamoe bri keu jihnyan rahmat ‘Oh Iheuh meularat jih dalam susah Jikheun atranyoe usaha droelon Kiamat pajan nyan bek tapeugah Lon pike hana uroe kiamat Tan le meularat ka seunang leupah Meunyo geupeuwoe lon bak Tuhanlon Cit got that keu lon hana meusalah Kamoe peugah dum amai sikaphe Di jih han jeut le sapeue jipeugah Buet jihnyan dilee meupeugah bandum Rasa treuk bandum azeub that leupah Kamoe peurasa Keu jihnyan azeub
  51. Insan dum meuhat cit le that ulah Watee Kamoe bri keu jihnyan nikmat Jipaleng meuhat droe jipeusalah Meunyo nyang jeuheut teuka ubak jih Meuduʻa di jih panyang sileupah
  52. Takheun boh pakri meunyo atranyan Sideh bak Tuhan asai geupeugah Teuma takaphe ‘oh lheuh nibaknyan Soe leubeh yohnyan sisat that leupah Nyan keuh tantangan keubit jioh that
  53. Jieu treuk ayat Kamoe peuleumah Tanda jikalon dum di angkasa Bak droejih pih na tanda le leupah Hingga trang bak jih atranyoe beuna Han sep nyan teuma kuasa Allah Cukop Po gata dumpeue Neukalon
  54. Di jih roe mantong ragu jih leupah Ragu jih peue ek meureumpok Tuhan Han jitem simban atejih teuhah Teuma di Tuhan dumpeue Neuteupue ‘Eleumee Neuh nyoe leupah that luah
Prev Next