37.Those drawn up in Ranks

  1. Demi dum nyang dong meubanja-banja
  2. Nyang dhot dum hamba su raya leupah
  3. Demi nyang baca dum ayat Tuhan
  4. Keubit roe Tuhan cit sidroe Allah Tuhan gata dum Droeneuhnyan sidroe
  5. Langet ngon bumoe sit milek Allah Langet ngon bumoe ngon bandum asoe Tuhanku sidroe nyang Po peurintah Teumpat jiteubiet dum mata uroe Bandum sinaroe sit milek Allah
  6. Keubit di Kamoe meupeungui langet Bintang meubl‘et-blʻet hu meujeureulah Bak langet nyang toe leumah dum bintang
  7. Ngon jaga chetan bek troh jilangkah
  8. Bek jijak deunge bak alam manyang Geurhom jih yohnyan hana pat balah Ban siseulingka jihnyan dum geurhom
  9. Meuteugom-teugom azeub jih leupah
  10. Meulengkan nyang na jiteumee sama Meteor teuma keu jih geukeubah Bintang meuiku ngon geulet jihnyan
  11. Teuma bak jihnyan jinoe tapeugah Tatanyong bak jih soe leubeh hebat Nyang Kamoe peujeut masa nyang sudah Peue na leubeh jih nibak awak jeh Meupeujeut dum jih bak tanoh basah Bak tanoh leukiet asai jih bandum
  12. Tapi jeut hireun teuh ‘oh jipeugah ‘Oh jipeueleh teuh jipeuluwat
  13. ‘Oh tapeuingat jikheun beurakah Bandum di jih han jeut keu peuingat
  14. ‘Oh jieu ayat jikhem meuhah-hah
  15. Jikheun atranyoe sihe nyata that
  16. Tanyoe ka teupat udep geupeugah Tanyoe ka mate ka jeut keu tanoh Tuleung ngon tanoh meusapat sudah Ek geubangket lom teuma geutanyoe
  17. Ngon yah-yah tanyoe nyang ka trep leupah
  18. Takheun nyoe keubit gata watee nyoe Hina sapeue tan pih jeut tapeugah
  19. Sigo geudeumpek sagai watee nyan Jikalon yoh nyan hebat sileupah
  20. Jikheun ceulaka bandum gata nyoe Ka troh uroenyoe teurimong balah
  21. Nyoe keuh uroenyoe peuputoh hukom Nyang dilee takheun sulet sileupah
  22. Peusapat bandum awak lalem nyan Peurumoh jihnyan pih bek takeubah Peusapat ngon jih bandum di sinan Ngon tuhan jihnyan dum nyang jiseumah
  23. Nyang bukon Allah di jih keu tuhan Yue jak jih rijang lam apui mirah Peuleumah jalan jak lam nuraka Di jih that hawa keunan jilangkah
  24. Yue piyoh dilee mangat geutanyong
  25. Hana soe tulong lagoe dum di kah Pakon han kaba ureueng nyang tulong
  26. Tapi jih bandum ka jimeunyerah Seumateh jih that bandum uroe nyoe
  27. Sabe keudroe-droe peusalah-salah
  28. Jikheun gata roe nyang padan kamoe Ret uneun kamoe tadong tapeugah
  29. Seuot keupala sit droe teuh meunan Han tameuiman keu Rasul Allah
  30. Hana kuasa kamoe keu gata Sit droeteuh gata nyang pubuet salah Droe gata bandum nyang darohaka
  31. Teuma jinoe ka putusan Allah Bandum geutanyoe jinoe tarasa Hana le daya droeteuh tapeuglah
  32. Kamoe peusisat takheun dum gata Di kamoe sit ka sisat sileupah
  33. Bandum awaknyan teuma lam azeub Sinan meusapat hana soe peuglah
  34. Meunan keuh Kamoe meubri alasan Keu soe nyang meunan jipubuet salah
  35. ‘Oh watee geukheun ubak awaknyan Tan laen Tuhan meulengkan Allah Di jih teukabo jipeurayok droe
  36. Jikheun peue kamoe meubalek ulah Meukeubah keudeh dum tuhan kamoe Sabab soe jih nyoe nyang poh beurakah Jeut jimeupanton ngon pungo gila
  37. Tapi geujakba bak jih peurintah Peurintah Tuhan nyang bit that beuna Lom geupeubeuna Rasul nyang sudah Rasul nyang dilee bandum sit beuna
  38. Teuma dum gata azeub that leupah Azeub peudeh that jinoe tarasa
  39. Ban nyang keurija teuh meunan balah
  40. Meulengkan ureueng nyang hamba Tuhan Buet keubajikan deungon ikheulah
  41. Ureueng nyan bandum ka na raseuki Maklum sendiri ka Tuhan keubah
  42. Padum boh kayee dum keu ureueng nyan Lom penghormatan Neubri le Allah
  43. Dalam churuga nyang le that nikmat
  44. Meuhadap-hadap ateuh peuratah
  45. Geuidang ngon glah dum keu ureueng nyan Asoe minuman jeureuengeh leupah
  46. Wareuna puteh ie jeureuengeh that Rasa jih lazat tajep puleh grah
  47. Hana dalam ie nyang jeut keu mumang Mabok teuh pih han teunang sileupah
  48. Budiyadari dum di geunireng Hana nyang mireng mata cit indah
  49. Lagee boh manok tatroh tasimpan
  50. Teuma ureueng nyan meupeugah-peugah
  51. Nyang sidroe geukheun di lon na rakan
  52. Jikheun gata nyan karoh meusalah Keu peue tapateh nyang jipeugah nyoe
  53. ‘Oh mate tanyoe ka abeh sudah Ka jeut keu tanoh bandum geutanyoe Tuleung ka cre-bre ka bicah-bicah Ek na lom balah geubri keu tanyoe
  54. Geukheun boh jinoe tajak ziarah Neutem jak kalon awaknyan jinoe
  55. Geujak treuk keunoe geukalon ulah Geueu treuk jih ka dalam nuraka
  56. Geukheun treuk sigra demi nyoe Allah Karap tapeubloh lon sajan gata
  57. Adak sangkira kon nikmat Allah Adak kon Neubri nikmat le Po lon Ka keuh roh lon lon lam apui mirah
  58. Peue teuma tanyoe han mate teuh le
  59. ‘Oh lheuh phon mate dilee ka sudah Han geubri azeub le keu geutanyoe
  60. Keubit atranyoe bahgia leupah Nyoe keumenangan nyang raya that-that
  61. Adak jeut umat jipubuet salah Lagee nyoe bandum beu jitem pubuet Le soe nyang pubuet mangat meutuah
  62. Soe got nyan teuma ngon kayee zaqum
  63. Bala keu kawom nyang pubuet salah Awak nyang lalem dum Kamoe ujoe Ngon bak kayee nyoe lam apui mirah
  64. Asai kayee nyoe dalam nuraka
  65. Manyam jih raya hebat sileupah Sang ule chetan takalon rupa
  66. Jipajoh sigra le ureueng salah Peunoh le ngon pruet jih ube raya
  67. le tutong teuma jijep le bagah Te tutong that-that han ek takira
  68. Lheuh nyan jigisa lam apui mirah Dalam nuraka keudeh dum jiwoe
  69. Sabab awak nyoe jiikot ayah Ayah jih jieu sit ureueng sisat
  70. Jiseutot ligat dum bagah-bagah
  71. Ureueng nyang dilee le that ka sisat Yoh goh jih meuhat sabab buet salah
  72. Ka Kamoe kirem rasul dum bak jih Keu peuingat jih peue nyang peurintah
  73. Teuma takalon pakri akibat Lheuh geupeuingat jipubuet salah
  74. Meulengkan teuma dum hamba Tuhan Nyang amai jihnyan keubit ikheulah
  75. Nabi Noh dilee geumeuhoi kamoe Teuma di kamoe meuseuot bagah Hana nyang leubeh nibak Hadharat Nyang peutroh hajat soe nyang lam susah
  76. Kamoe peuleupah treuk teuma gopnyan Sabab watee nyan gopnyan that susah Meupeuglah gopnyan ngon ahli gopnyan
  77. Tinggai treuk gopnyan mantong meukeubah Ngon aneuk cuco nyang gantoe gopnyan
  78. Jeut nama gopnyan geupeugah-peugah Le ureueng dudoe di likot gopnyan Kamoe keubah nan geuh lam seujarah
  79. Seulamat hai Noh gata lam alam
  80. Di Kamoe meunan sabe meubalah Soe nyang pubuet got meubalah meunan
  81. Sabab meuiman di Noh keu Allah Dum hamba Kamoe nyang na meuiman Nyang lagee gopnyan bandum meutuah
  82. Teuma nyang laen nyang han meuiman Kamoe peukaram lam laot luah
  83. Ibrahim teuma pih kawom gopnyan Saban ngon gopnyan ureueng meutuah
  84. Geujak bak Tuhan ngon ate salim Keubit Ibrahim ureueng nyang ceudah
  85. Geukheun bak yah geuh ngon kawom gopnyan Peue taseumah nyan tacuba peugah
  86. Peue dum tapeugot tuhan paleusu Nyan tan meunapsu nyang bukon Allah
  87. Peue na tapike soe nyang Po alam Nyan keuh nyang Tuhan nyang jeut taseumah
  88. Teuma geutilek dum bintang-bintang
  89. Geukheun treuk yoh nyan lon nyoe ka parah Lon nyoe ka saket ulee ka mumang
  90. Jijak treuk yohnyan gopnyan jikeubah ‘Oh ban meulikot jijak awaknyan
  91. Bak Tuhan jihnyan geujak treuk bagah Geukheun treuk bak jih peue haba dumnyoe Pakon han sapeue ka pajoh di kah
  92. Pakon han sapeue pih na jeut ka kheun
  93. Ngon jaroe uneun geukhok le bagah Abeh dum geuphok tuhan awaknyan
  94. Troh treuk awaknyan beungeh jih leupah
  95. Geukheun peue gata pubuet lagee nyoe Lheuh tapheut keudroe teuma taseumah
  96. Tuhan nyang peujeut gatanyoe bandum Buet teuh pih bandum peuneujeut Allah
  97. Jikheun treuk tamon kayee dum keunoe Nak tatiek jihnyoe lam apui mirah
  98. Jikeumeung daya gopnyan jimeung poh Ka keuh u baroh jih Kamoe keubah Jeut teuma jihnyan nyang paleng miyup
  99. Ibrahim ban buet teuma geupeugah Di lon lon meung jak peurintah Po lon Neutunyok keu lon teuma bek salah
  100. Tuhanku Neubri keu lon beu leubeh Aneuk nyang saleh jigantoe ayah
  101. Kamoe peusuka treuk teuma gopnyan Ngon aneuk agam nyang halim leupah
  102. ‘Oh ban rayok jih jak sajan Kamoe Geukheun treuk yohnyan aneuk meutuah Lon leumpoe gata Neuyue koh takue Pakri aneuk droe pike tapeugah Seuot treuk aneuk hai ayah Teungku Neupubuet laju peue nyang peurintah Insya Allah lon akan lon saba Neukalon nyata teuma hai ayah
  103. ‘Oh ban meunyerah bandua gopnyan Geupeueh yohnyan treuk aneuk lidah Geumeukoh takue laju watee nyan
  104. Kamoe hoi gopnyan teuma le bagah Wahe Ibrahim tadeungo jinoe
  105. Nyang gata leumpoe beuna that leupah Sabab tapateh peue nyang taleumpoe Meunan keuh Kamoe akan meubalah Sit Kamoe balah soe nyang pubuet got
  106. Ujian that brat atranyoe sudah Keubit cubaan nyang leupah nyata
  107. Meuteuboh teuma le Kamoe bagah Meujok sie laen nyang leubeh raya
  108. Nan gopnyan teuma jipeugah-peugah Keu ureueng dudoe di likot gopnyan Kamoe keubah nan geuh lam seujarah
  109. Teuma seulamat ateuh Iþrahim
  110. Di Kamoe meunan sabe meubalah Ureueng pubuet got meubalah meunan
  111. Sabab meuiman gopnyan keu Allah Dum hamba Kamoe nyang na meuiman A Nyang lagee gopnyan bandum meutuah
  112. Haba gembira keu gopnyan meubri Ishak Nabi nyang saleh leupah
  113. Meubri beureukat teuma keu gopnyan Ngon Ishak nyan nyang aneuk lidah Aneuk ngon cuco gopnyan bandua Nyang ladom beuna nyang ladom salah Ladom pubuet got nyang ladom teuma Droe jielanya nyata sileupah
  114. Kamoe bri nikmat teuma keu Musa Ngon Harun dua geuh that meutuah
  115. Meupeuglah gopnyan ngon kawom gopnyan Sabab ureueng nyan raya that susah
  116. Kamoe tulong geuh hingga ka meunang
  117. Meubri keu gopnyan teuma risalah Kitab nyang nyata meubri keu gopnyan
  118. Bandua gopnyan jakba peurintah Kamoe peutunyok jalan nyang teupat
  119. Jeut gopnyan meuhat gop peugah-peugah Keu ureueng dudoe di likot gopnyan Kamoe keubah nan geuh lam seujarah
  120. Seulamat atëuh Musa ngon Harun
  121. Di Kamoe meunan sabe meubalah Ureueng pubuet got meubalah meunan
  122. Sabab meuiman gopnyan keu Allah Dum hamba Kamoe nyang lagee gopnyan Bandua gopnyan bandum meutuah
  123. Teuma Ilyas pih Rasul Tuhan
  124. Bak kawom gopnyan teuma geupeugah Pakon han takwa gata keu Tuhan
  125. Keu peue Baʻal nyan nyang tajak seumah Takeubah Tuhan nyang peujeut alam Nyang jroh hana ban cit sidroe Allah
  126. Tuhan Po gata ngon Po yah gata Nyang dilee masa bandum ka sudah
  127. Jipeugah sulet teuma keu gopnyan Ka keuh jih dumnyan lam apui mirah Bandum awaknyan asoe nuraka
  128. Meulengkan hamba dum nyang ikheulah
  129. ‘Oh dudoe teuma hana le gopnyan Jeut nama gopnyan geupeugah-peugah Le ureueng dudoe di likot gopnyan Kamoe keubah nan. geuh lam seujarah
  130. Ateuh Ilyas saleum seulamat
  131. Di Kamoe meuhat meunan meubalah Ureueng pubuet got meubalah meunan
  132. Sabab meuiman gopnyan keu Allah Dum hamba Kamoe nyang na meuiman Nyang lagee gopnyan bandum meutuah
  133. Nabi Luth teuma pih Rasul Tuhan
  134. Bak watee gopnyan Kamoe peuleupah Meupeuglah gopnyan ngon ahli gopnyan Bek le di sinan ngon awak salah
  135. Meulengkan sidroe inong nyang tuha Ka keuh binasa sinan meukeubah
  136. Lheuhnyan bandum jih meupeubinasa Nyang darohaka bandum ka Sudah
  137. Bak watee beungoh meunyoe tajak-jak Takalon jeujak euncit jih leumah
  138. Got pih tajak-jak ʻoh watee malam Pakon han tapham ngon akai ceudah
  139. Yunus pih teuma sit Rasul Tuhan
  140. Teuma dì gopnyan geuplueng that bagah Geuek lam kapai peunoh muatan
  141. Teuma roh gopnyan bak top soe salah Talo treuk gopnyan geugrop lam laot
  142. Jiʻuet le eungkot teuma le bagah Teuma jicaci jikheun keu gopnyan
  143. Adak kon gopnyan geupujoe Allah Adak kon sabe geukheun teuseubeh
  144. Meuhat trep geupreh hana soe peuglah Dalam pruet eungkot geupreh sinan trep Hingga Neubangket teuma le Allah Bak uroe bangket baroglah gopnyan
  145. Kamoe tiek gopnyan bak pasi luah Gopnyan pih saket teuma wateenyan
  146. Timoh treuk sinan bak kayee bagah Kamoe peutimoh sinan bak labu
  147. Bak nanggroe makmu rakyat barollah Sireutoh ribee rakyat di sinan Leubeh nibaknyan kadang jumeulah Teuma meukirem treuk gopnyan keunan
  148. Ureueng meuiman teuma le bagah Kamoe bri seunang teuma ureueng nyan Dang-dang troh keunan watee meupisah
  149. Teuma tatanyong bak jih dum jinoe Pakon jeut meunoe di jih jipeugah Aneuk nyang inong jikheun keu Tuhan Aneuk nyang agam keudroe jikeubah
  150. Atawa inong dum malaikat Peue na jilihat meunan jipeugah Yoh Kamoe peujeut peuna jikalon
  151. Meu kana jikheun keu ayeum babah Jipeuna-peuna sulet keu Tuhan
  152. Na aneuk Tuhan di jih jipeugah Keubit sulet that bandum awaknyan
  153. Ek aneuk inong Neutueng le Allah Neutinggai teuma dum aneuk agam
  154. Peue hukom teuh nyan meu ka tapeugah
  155. Peue gata dum han jeut keu pikiran
  156. Peue gata dum nyan kuasa leupah Meunyoe bit nyata gata kuasa
  157. Toh kitab gata me keunoe bagah Meunyoe bit gata ureueng nyang beuna
  158. Jikheun chedara lom jen ngon Allah Padahai di jen sit ka jiteupue Bandum awaknyoe lam apui mirah Keudeh jitamong dalam nuraka
  159. Allah Taʻala suci that leupah Maha suci Neuh bak peue nyang jih kheun
  160. Meulengkan ureueng nyang bit ikheulah Soe nyang gleh ate dum hamba Tuhan
  161. Bandum gatanyan han ek tailah Peue nyang taseumah pih lagee gata
  162. Han ek tadaya dum hamba Allah
  163. Meulengkan soe nyang asoe nuraka
  164. Di kamoe teuma bandum na tugah Sit ka meuteuntee dum buet di kamoe
  165. Meubareh keudroe ikot peurintah Meubanja-banja kamoe meubareh
  166. Meukheun teuseubeh meupujoe Allah
  167. Teuma awaknyan meuhat dum jikheun
  168. Kitab dum jameun hana soe keubah Hana geutinggai le ureueng jameun Meunyo nyan takheun raya phaedah
  169. Meuhat jeut tanyoe keu hamba Tuhan Ikheulah keu Tuhan ikot peurintah
  170. Teuma jikaphe cit di jih jinoe Jiteupue dudoe teuma geubalah
  171. Atra sit kana putusan Kamoe Keu hamba Kamoe dum Rasul Allah
  172. Bandum meutulong teuma ureueng nyan Sabab ureueng nyan jakba peurintah
  173. Teuntra Kamoe nyan meuhat nyang meunang
  174. Gata sabab nyan bek jeut keu susah Bek tapeuduli keu jihnyan dilee Dang-dang troh watee putusan Allah
  175. Teuma tapeutrang bak jih akibat Akan jilihat teuma trang leupah
  176. Peue napsu azeub beurijang di jih
  177. Meunyo troh bak jih ka jeut keu susah ‘Oh beudoh beungoh ceulaka that-that Yoh geupeuingat dilee jibantah
  178. Bek tapeuduli keu jihnyan dilee Dang-dang troh watee putusan Allah
  179. Teuma tapeutrang bak jih akibat Akan jilihat teuma trang leupah
  180. Maha suci Po teuh nyang Perkasa Meubacut hana lagee jih peugah
  181. Saleum seulamat keu Rasul bandum
  182. Pujoe pih bandum meuwoe keu Allah Pujoe keu Tuhan nyang Po dum alam Dum seukalian cit milek Allah
Prev Next