36.Yaseen

  1. Yasin Tuhan nyang teupue meukeusud ayat Sabab Hadharat hana geupeugah
  2. Demi Qur'an nyang le hikeumat
  3. Gata Muhammad bit Rasul Allah
  4. Neupeutron ateuh jalan nyang teupat
  5. Uleh Hadharat Meugah ngon Murah
  6. Mangat tapeutron bak bandum umat Haba peuingat takot keu Allah Yah-yah jih dilee ka geupeuingat Lale dum sisat gadoh sileupah
  7. Ka kada keubit nibak Hadharat Awaknyan le that iman ka salah Han jimeuiman akan Hadharat Meunan ka teutap Neubri le Allah
  8. Kamoe boh rante bak takue meuhat Keudeh meuikat bak kudok leupah
  9. Di keu di likot Kamoe top rapat Han deuh jilihat sapeue tan leumah
  10. Teuma di kaphe meunyo ka sisat Tabri nasehat hana phaedah i Han tapeuingat got tapeuingat Di jih cit sisat iman ka salah
  11. Kon macam jihnyan nyang tapeuingat Teutapi umat nyang ikot Allah Umat nyang pateh uroe kiamat Akan Hadharat teumakot leupah Haba gembira keu jihnyan meuhat Ampon Hadharat pahla Neubalah
  12. Ureueng nyang mate Kamoe peuudep Watee Neubangket bandum le Allah Amai jih dilee yoh masa hayat Bandum meusurat beuna ngon salah Peue nyang jipubuet bandum meusurat Meuboh lam kitab nyata sileupah
  13. Tapeugot miseu wahe Muhammad ¿ Jeut keu ibarat sinan tapeugah Bak saboh nanggroe na saboh umat Rasul Hadharat keunan geulangkah
  14. Dua droe teuka rasul Hadharat Teuma di umat sulet jipeugah Hingga Neukirem uleh Hadharat Nyang keu lIhee meuhat utusan Allah Teuma geupeugah ubak dum umat Kamoe nyoe meuhat nyoe rasul Allah
  15. Umat dum jaweub gata sulet that Hana Hadharat kirem peurintah Kamoe pih insan gata pih basyar Tanyoe saban that hana meuubah
  16. Rasul dum jaweub geukheun bak umat Tuhan Hadharat teupue peurintah Kamoe bit rasul nibak Hadharat Hana bak teumpat haba beurakah
  17. Di kamoe sagai meupeutroh siat
  18. Jijaweub ligat gata nyang salah Ngon sabab gata kamoe meularat Tapiyoh ligat bek le tapeugah Meu han tapiyoh meupoh ngon tungkat Gata meularat azeub sileupah
  19. Jaweub dum rasul kamoe kon sisat Droe gata meuhat nyang hana tuah Han tatem pateh kamoe peuingat Gata nyang batat tulak peurintah
  20. Na sidroe ureueng troh keunan ligat Nanggroe jioh that sideh geulangkah Ubak kawomnyan geubri nasehat Ikot hai sahbat kheun Rasulullah
  21. (Pateh hai rakan ureueng nyoe teupat Hana meuhajat geutueng phaedah JUZ 23) Geujak peutunyok ureueng nyang sisat Hana geuhajat meubacut upah
  22. Pakon han di lon ulon ibadat Lon seumah meuhat sit sidroe Allah Tuhan peujeut lon deungon lat-batat Tawoe dum meuhat dudoe bak Allah
  23. Keu peue lon seumah tuhan charikat Lonjak ibadat bak nyang kon Allah Meunyo lon susah kheundak Hadharat Tuhan charikat han ek jiilah Han ek jilakee peulheuh lon siat Meunyo meularat han ek jipeuglah
  24. Meunyo lon pateh tuhan charikat Teuntee lon sisat nyata sileupah
  25. Di lon meuiman akan Hadharat Deungo hai sahbat peue nyang lon peugah
  26. Ureueng nyan teuma balah Hadharat Churuga meuhat tamong beu bagah Watee nyan geukheun teuma sayang that Kawom lon batat sayang that leupah Adak jiteupue balah Hadharat
  27. Neuampon ligat keu lon dum salah Neupeumulia keu lon lom that-that
  28. Kawom geuh teutap jipubuet salah 3 Di likot gopnyan hana peue le that Uleh Hadharat teuntra Neuyue krah Hana Neukirem dum malaikat Nėéuyue prang rakyat nyang pubuet salah
  29. Cukop ngon deumpek sigoe nyang that-that Bandum jih teupat nyawong meusiblah
  30. Sayang takalon nasib dum rakyat Rasul Hadharat jikheun beurakah Jiulok-ulok jikheun sulet that
  31. Hana jilihat nyang ka Neubalah Peue hana jieu padum le umat Sabab khianat dilee keu Allah Bandum binasa hana seulamat Hana woe meuhat bandum ka leupah
  32. Umat nyan bandum keudeh meusapat Ukeu Hadharat Neumeung bri balah
  33. Lom saboh tanda kuasa Neuh that Tuhan Hadharat kuasa leupah Tanoh nyang mate udep le siat Timoh le ligat kayee nyang ceudah Jimeuboh kayee rasa jih lazat Tapajoh ligat mangat sileupah
  34. Timoh di lampoh kurma ngon inab Babah han seungap tapajoh bagah Teupanca ngon krueng ie jeureuengeh that
  35. Tapajoh ligat peue nyang na mudah Pajoh boh kayee peugot bu lukat Chuko le ligat keu nikmat Allah Pakon di kaphe hana jiingat Hana meu siat chuko keu Allah
  36. Tuhanku sidroe Maha Suci that i Timoh lat-batat takalon indah Inong ngon agam meujudo meuhat Saban ngon rakyat dum hamba Allah Bandum meujudo han ek tatupat Tuhan Hadharat bandum Neuulah
  37. Teuma saboh treuk tanda raya that Kuasa meuhat sidroe Potallah Malam ngon uroe gantoe siat-at ‘Oh Iheuh trang that-that seupot sileupah
  38. Mata uroe jak sabe bak teumpat Hana meu siat meusireuk langkah Meunan Neukada uleh Hadharat Tuhan meugah that ‘eleumee luah
  39. Buleuen di langet phon-phon ubit that Teuma deuh bulat malam limong blah Dudoe meugisa ubit lom meuhat Sang mata sadeup hu meujeureulah
  40. Buleuen ngon uroe han tom meusapat Tuhan Hadharat sit Neupeusiblah 3 Han tom meureumpok bak saboh teumpat Na jalan teupat meusiblah-siblah
  41. Saboh tanda treuk teuga Hadharat Kapai nyang sarat lam laot luah Aneuk ngon cuco soe meu neurangkat Lam kapai ligat jitamong bagah
  42. Laen nibak nyan keundraan di darat Han ek tahisab macam le leupah
  43. Meunyo Neukheundak uleh Hadharat Kapai nyan siat anco ngon bicah Ureueng dum karam tulong han sapat
  44. Meu kon Hadharat hana soe peuglah Meulengkan meu na Kamoe bri rahmat Seulamat siat han mate bagah
  45. ‘Oh Rasul peugah ubak dum umat Beuthat taingat kuasa Allah Kawom nyang dilee hana seulamat Dudoe pih meuhat hana meuubah Bandum atranyoe meu tatem ingat Keu gata rahmat Neubri le Allah
  46. Sayang takalon teuma dum umat ‘Oh teuka ayat tron nibak Allah Muka ho laen jipaleng ligat
  47. Lom geupeuingat teuma geupeugah Raseukiteuh le Tuhan bri meuhat Ureueng meularat tabri seudeukah Teuma jijaweub le kaphe sisat k Jikheun bak umat iman keu Allah Ureueng nyan meunan kada Hadharat Hana meuhajat di jih napakah Meunyoe Neumeu jok uleh Hadharat Kon Neubri ligat peue nyang jeut susah Keubit nyoe gata nyata that sisat
  48. Jikheun lom meuhat kaphe seurakah Janjiteuh nyang nyoe pajan taintat Meunyoe beuna that gata tapeugah
  49. Hana peue jipreh hukom Hadharat Sit troh le siat kon trep sileupah Sigo geudeumpek le malaikat Abeh dum teupat teungeh meubantah
  50. Hana meuteumee wasiet meusiat Sabab Hadharat ka Neupeurintah Hana le jiwoe ubak keurabat Tinggai dum meuhat hana peue peugah
  51. Geuyup beuragoe le malaikat f Bandum jih meuhat beudoh le bagah Bandum geubangket ngon badan bulat Geuyue meuhadap keudeh bak Allah
  52. Watee nyan jikheun le kaphe sisat Ceulaka that-that tanyoe sileupah Soe nyang peubangket tanyoe bak teumpat Teuntee Hadharat nyang Maha Murah Janji uroejeh ka teuka meuhat Rasul beuna that ban nyang geupeugah
  53. Sigo geudeumpek le malaikat Bandum meusapat keudeh bak Allah
  54. Uroe nyoe nyata Tuhan ade that Ban laku adat bandum Neubalah Hana elanya meu sidroe rakyat Amai dum meuhat keudroe jipeugah
  55. Asoe churuga jinoe seunang that Geuduek ngon sahbat meupeugah-peugah
  56. Budiyadari sajan meusapat Ngon judo meuhat bineh peuratah Di yup bak kayee nyang reului that-that Meusadeu ligat seunang sileupah
  57. Pajoh boh kayee nyang lazat-lazat Lom peue nyang hajat cit troh le bagah
  58. Seulamat datang Neukheun le ligat Uleh Hadharat nyang Maha Murah
  59. Teuma di kaphe suroh Hadharat Beumeukleh teumpat uroenyoe di kah
  60. Hai aneuk adam deunge dum beuthat i Dilee ka meuhat janji lon peugah Bek roh taseumah chetan nyang sisat Musoh raya that nyata sileupah
  61. Tapi taseumah Ulon Hadharat Jalan nyang teupat hana meuilah
  62. Hana tapike padumna rakyat Nyang ka lam sisat Neubri le Allah
  63. Nyoe keuh nuraka di kah keu teumpat Janji Hadharat ka lheuh Neupeugah
  64. Jak tamong laju hai kaphe sisat Nuraka meuhat uroenyoe di kah
  65. Uroenyoe babah ka teutop rapat Hana meusiat pih jeut jipeuhah Jaroe ngon gaki jimarit ligat Kamoe jak intat ubak buet salah Peue nyang jipubuet yoh masa hayat Bandum ban teupat anggota peugah
  66. Meunyoe Neukheundak uleh Hadharat Buta le siat mata nyang ceudah Han deuh jikalon jalan nyang teupat Pakri jilihat beuna ngon salah
  67. Meu Kamoe kheundak keumeung peusisat Rupajih meuhat meubalek bagah Hana jituho timu ngon barat Teudong bak teumpat han meubot langkah Hajat jimeuwoe rot hana meupat Jalan ka sisat ka roh nyang salah
  68. Hana jipike teuma di umat Umu panyang that tuha sileupah Meu ka that tuha akai ka singkat Meuwoe manyak that akai ka reundah
  69. Jikheun keu Nabi panton neusurat Padahai ayat nyang tron bak Allah Han patot Nabi meupanton meuhat Haba peuingat Qur'an neupeugah
  70. Ureueng nyang udep neuyue peuingat Saket ngon mangat beuna ngon salah Teuma soe kaphe ka putoh meuhat Nuraka teumpat hana meuubah
  71. Peue hana jieu binatang le that Uleh Hadharat Neupeujeut mudah Binatang ternak jitheun taikat
  72. Jipubuet ligat peue tapeurintah Ladom tagiduek ladom taikat Nyang ladom meuhat meʻue di sawah Ladom tapajoh sie jih mangat that
  73. Munaphaʻat le that raya phaedah Susu jih tajep rasa jih lazat Peu sit han umat chuko keu Allah
  74. Teuma di kaphe tuhan jih le that Buken Hadharat nyang Maha Murah Jipike sang ek tulong meularat Sabab ka le that tuhan jipeugah
  75. Han ek jitulong jihnyan dum meuhat Beuthat bak kasad teuntra jikeubah Jipike nyan keuh teuntra jih meuhat Peuglah meularat jih watee susah
  76. Bek jeut keu gundah gata jiupat Narit jih meuhat hana meubeukah Rahsia jih dum Kamoe teupue that Nyang lahe meuhat leubeh lom mudah
  77. Peue manusia hana jilihat 1 Tuhan Hadharat kuasa leupah Kamoe peujeut jih bak ie bacut that Pakon jeut sisat lawan peurintah
  78. Jikheun keu Kamoe na meucharikat Hana jilihat tubohjih indah Teuma jitanyeng bak gata ligat Sang hana teupat narit tapeugah Tuleung ka anco di dalam jeurat Udep le siat mustahe leupah
  79. Takheun ubakjih buet nyan mudah that Uleh Hadharat ka Neupeuleumah Ka lheuh Neupeujeut dilee jih meuhat Peuudep siat leubeh that mudah Tuhan Neuteupue bandum lat-batat Hana peue sasat ‘eleumee Allah
  80. Tuhan nyang peujeut kayee ijo that Meuie bak urat takalon basah Teutapi apui sinan jeut meuhat Kayee udep that tutong le bagah Peuudep apui hu jih le ligat Kheundak Hadharat bah kayee basah
  81. Tuhan nyang peujeut bandum lat-batat Kuasa that-that hana peue peugah Langet ngon bumoe Neupeujeut siat Nyang laen meuhat peue han ek mudah Neupeujeut jih dum kon buet mangat that Tuhan Hadharat ‘eleumee luah
  82. Watee Neukheundak uleh Hadharat Barangpeue hajat Neumeung peurintah Neukheun jeut di kah jinoe le ligat Ase le siat hana meupayah
  83. Tuhanku sidroe Maha Suci that Bandum lat-batat lam jaroe Allah Barangpeue kheundak ase le siat Tanyoe pih meuhat tawoe bak Allah
Prev Next