Keu ureueng nyan dum peutunyok Tuhan Nibak Po gopnyan nyang Maha murah Nyan keuh ureueng nyan nyang meubahgia
Na manusia teuma nyang salah Jijak bloe narit nyang sia-sia Gop dum jimaba bak buet nyang salah Jipeusisat gop bak jalan Tuhan ‘Eleumee jih tan jikheun beurakah Jiulok-ulok keu jalan Tuhan Azeub keu jih nyan hina sileupah
Watee geubaca dum ayat Kamoe Teukabo jihnyan hana ban peugah Jipaleng sang-sang hana jideungo Adak jideungo hana jipapah Sang-sang na sumpai lam geulinyueng jih Tapeugah bak jih azeub that leupah Tapeugah keu jih azeub peudeh that
Nyang mukmin meuhat nyang raya tuah Soe nyang meuiman ngon buet jih pih got Churuga nikmat ka lheuh geukeubah Churuga indah geubri keu gopnyan
Keukai geuh sinan ka janji Allah Meu janji Tuhan teuntee beunar that Tuhan Hadharat kuasa leupah Keubit roe Tuhan Maha Perkasa Ngon bijaksana Neuh han ban peugah
Neupeujeut langet dum hana tiang Sit takalon trang ajeb sileupah Neupeuduek gunong dum dalam bumoe Mangat gatanyoe bek apoh-apah Mangat gata dum bek that meuguncang Lom ngon binatang pih le that leupah Sideh di langet meupeutren ujeun Udep tanaman seunang teuh leupah Kamoe peutimoh bandum tanaman Galak teuh han ban takalon indah
Atranyan bandum peuneujeut Tuhan å Nyang bukon Tuhan peue na phaedah $ Peue na jipeujeut le nyang kon Tuhan Nyang takheun Tuhan nyang bukon Allah Tapi soe lalem keubit jih sisat Taeu nyata that hana meuilah
Ubak Luqman ka lheuh Kamoe bri Hikeumah suci chuko keu Allah Barangsoe chuko munaphaʻat keu droe Jeh laen bagoe ureueng nyang salah Soe-soe nyang kaphe pulang bak Tuhan Kaya that Tuhan hana ban peugah Tuhan nyang patot teurimong puja
Lukman kheun meunoe bak aneuk lidah Geukheun hai aneuk “‘geubri nasehat Bek peucharikat sagai keu Allah Tapeucharikat Tuhan ngon laen Buet teuh nyan lalem raya that salah
Lom Kamoe wasiet bak manusia Ibu ngon bapa beu got tapapah Pakriban le ma geutanggong saket Siblet dua blet gopnyan lam susah Meubaro geulhah umu dua thon Saket geutanggong hana geupeugah Tachuko keu Lon ngon ma-ku gata Dudoe tagisa keudeh bak Allah Bak Lon sit teuma keudeh tagisa
Meunyoe geupaksa geuyue buet salah Geupaksa gata peucharikat Lon Gata han meuphom peue nyan geupeugah Bek roh tataʻat keu dua gopnyan Sabab atranyan raya that salah Tarakan gopnyan di dalam donya Tapeumulia geuh bek tabantah Teuma taikot ureueng nyang tobat Jalan nyang teupat tawoe bak Allah Tobat sit bak Lon tawoe pih bak Lon Lon peugah le Lon buet nyang ka leupah Buet nyang tapubuet yoh masa dilee Bandum meuteuntee akan geubalah
Hai aneuk meunyoe tapeucharikat Beu that hana brat sagai tapeugah Be aneuk sawi sagai lam batee Bah ka meuseubee hana le leumah Sideh di langet got pih di bumoe Bandum Neuteupue sit nyan le Allah Keubit roe Tuhan Maha licen that Dum peue Neutupat Neumaklum sudah
Hai aneuk sabe pubuet seumbahyang Yue keubajikan tatham nyang salah Teuma tasaba peue-peue nyang teuka U ateuh gata kadang musibah Sabab atranyan leupah that peunteng
Bek meugeunireng peusinget babah Watee tamarit ngon manusia Bek sagai gata teukabo leupah Tajak lam bumoe pih bek teukabo Sabab teukabo han galak Allah
Peue hana taeu Tuhan bri gata Ek takuasa peue nyang meurimbah Peue nyang di langet ngon nyang di bumoe Bandum atranyoe ka ek taulah Lahe ngon baten nikmat keu gata Ek takuasa Neubri le Allah Na manusia nyang bantah Tuhan ‘Eleumee jih tan meu ka jipeugah Hana peutunyok keu jih bak Tuhan Nyang jeut keuh meunan di jih lam salah Lom hana kitab di jih nyang peutrang
Watee geukheun banlaju jibantah ‘Oh geuyue ikot nyang Tuhan peutron Di kamoe jikheun bah lagee ayah Ayah kamoe dum meunoe geupeugot Nyan kamoe ikot mangat bek salah Meunyoe ureueng nyan jihei le chetan Jipeugrop gopnyan lam apui mirah Peue jigrop jih lam apui nuraka
Nyang meubahgia ureueng meutuah Ureueng nyang jok droe keudeh bak Tuhan j Buet keubajikan han tom jikeubah Nyan ka jimumat bak taloe kong that Teuma akibat bandum bak Allah
Bek susah gata keu awak kaphe Sabab jikaphe jipubuet salah Bandum bak Kamoe jiwoe awaknyan Peue-peue buet jihnyan sit Kamoe peugah Peue nyang lam dada Tuhan Neuteupue Hana meusapeue pih na meuilah
Kamoe bri seunang keu jihnyan siat Azeub nyang brat that sit ka meukeubah
Meunyo tatanyong soe peujeut dum nyoe Langet ngon bumoe takalon luah Meuhat dum jikheun Tuhan peujeut nyoe Takheun dum pujoe meuwoe keu Allah Tapi le that jih hana jiteupue
Bandum barangpeue sit milek Allah Peue nyang di langet ngon nyang di bumoe Tuhanku sidroe kaya that leupah Tuhan keuh mantong patot tapujoe
Takira jinoe kalimah Allah Ube na kayee di bumoe Tuhan Tacui keu kalam tuleh keureutah Tacok keu daweut teuma ie laot Tujoh boh laot laen tatamah Han cit ek abeh kalimat Tuhan Keubit roe Tuhan perkasa leupah Bijaksana Neuh hana takira
Neupeujeut gata pakriban ulah Neubangket gata bandum pih saban Sang sidroe insan dumnan keuh mudah Keubit roe Tuhan Neuteupue dumpeue Neukalon dumpeue hana meuilah
Peue hana taeu pakri buet Tuhan Neupeulop malam dalam uroe crah Neupeulop uroe teuma lam malam Mata uroe trang hu meujeureulah Meunan pih buleun bandum jijalan Watee ka meujan hana meuubah Tuhan Neumaklum peue nyang tapubuet Barangkapeue buet Neumaklum sudah
Nyan keuh bit Tuhan sidroe nyang beunar Nyang laen teuma bandum sit salah Nyang bukon Allah nyang jikheun Tuhan Nyang keubit Tuhan manyang that leupah Lagi pih Tuhan Maha Raya that
Peue han talihat dum nikmat Allah Kapai meulayeu di laot raya Nikmat keu gata Neubri le Allah Neumeung peuleumah keunan bak gata Tanda kuasa Neuh han ban peugah Atranyan keubit roe jeut keu tanda Keu soe nyang saba chuko keu Allah
‘Oh teuka bakat nyang lagee gunong Kapai jilambong sang-sang ka beukah Jilakee duʻa laju bak Tuhan Agama jihnyan keubit ikheulah ‘Oh ban ka leupah jiek u darat Na sit nyang teupat hana meusalah Teuma nyang ungki keu ayat Kamoe Nyan keuh awaknyoe teukabo leupah Di jih jikaphe bandum keu nikmat Hana jiingat yoh dilee susah
Hai manusia takwa keu Tuhan Po gata dumnyan sit sidroe Allah Lom beu tatakot uroe nyang hebat Han le sipakat aneuk ngon ayah Ayah han jeut le geubila aneuk Meunan-pih aneuk han jeut jibalah Keu jasa ayah han jeut le ingat Janji Hadharat han jeut meuubah Teuma bek sagai jitipee gata Le udep donya seunang sileupah Lom bek jitipee gata le chetan Jiyue talawan peurintah Allah
Tuhan nyang teupue pajan kiamat Ujeun tren meuhat ‘eleumee Allah Lom pih Neuteupue peue nyang lam rahim Geutanyoe laen le that nyang salah Buet tanyoe singóh pih han tateupue - Jan mate tanyoe pih pat geukeubah i Teumpat teh nanggroe geutanyoe mate Han peue tapike pat nyang hʻeut Allah Keubit roe Tuhan dumpeue Neuteupue Neumaklum dumpeue hana meuilah