26.The Poets
- Taa-Siin-Miim (edde faxem Yalli yaaxige)
- Tah baxxaqqa-le Qhuraan kitaabih aayoota
- Nabiyow isi nafsi rookat finqissa, ama koros yeemene mara akke waanamih sabbatah
- Fanne Nee tekkek, qaraanak astay ken meesissay fillitte keenik xixxibaaneh rammak edde katewayta keenil (makki koros kinnuk) oobisenno
- Kaadu ama korosuh qusubuk ooba Qhuraanak Racmaan kinni Rabbih xaquk tu-keenih matamaata temeete tet tekkek, kaa dirabboysaanaah derre kaat cabak sugeenim akke waytek
- Toysa nummah usun Qhuraan dirabboyseeniih kaal anqaseenih, tokkel elle anqasak sugeenimih xaagi (Yallih digaala kinnuk) keenih amaate-le
- Kaadu A-koros baaxô fanah mawagittannaa! tet addal cooxuk kulli qaynatay qaxaleeh, meqek nuysubukeh gide
- Diggah tohut Yallih inkittinaanee kee kay dudda tascasse astá taniih, wohul keenik maggo mari yeemene mara makkon
- Diggah ku-Rabbi usuk Mayso-li xuwaw-li kinni
- Nabii Mucammadow isi marah cus: ku-Rabbi Nabii Muusah seeceeh, firqawni maray daalimiinih yanil gex kaak iyye waqdi
- Usun Firqawni mara, usun Yallih digaalák mameesitaanaa
- Nabii Muusa: yi-Rabbow diggah anu yoo dirabboysaanamak meesita iyye
- Kaadu usun yot aban dirabboysiyyah alil yok ceytaah, ku-farmoh gudduysiyyah arraba yok yaabe waytaamak mceesitak, Jibriil yi-toobokoyta Haaruunû fanah kaa rub farmô gudduysiyyah yoo catamkeh iyye
- Kaadu firqawnaa kee firqawni mari dambi yot-le num keenik qideeh, woo caneh yoo qidaanamak meesita iyye Nabii Muusa
- Yalli Nabii Muusak: Aleey koo maqidaanak, koo kee ku- toobokoyta Nabii Haaruun ni- astooti luk gexa, diggah Nanu catoh siinî luk nan isin ittaanam kee siinil gacsaanam naabbehik iyye
- Tokkel isin firqawnal gexaay, diggah nanu ginô Rabbih nımma farmoyta kinnino kaak ixxica
- Israa-iil xaylo cabaay, nelluk ken Rub kaak ixxica
- Firqawni Nabii Muusak: Ni addal alqih (saldih) anuk koo maqarsinninoo, kaadu maggo liggiditte ku-qumrik ni-addal masuginnitoo?kaak iyye
- Kaadu ku-uma taamay abteh iyya abteh (numtin qidim kinnuk), atu isih aben maqaane yangadde marih numuh anuk
- Nabii Muusa firqawnal gacisak:toysa anu tet abem anu iggima-le marak numuk teynah suge waqdi kaak iyye
- Tokkel anu siinik meesite wagqdi siinik kudeceh, yi-Rabbi nubuwwannu yoh yeceeh, farmoytiitik numuk teyna yoo abe iyye
- Woo niqmatay atu yoh guneh lowtaah warissa Israa-iil xaylo naqoosah haysitteemii
- Firqawni Nabii Muusal:kaxxamariinitak ginô Rabbi maatiyaay iyye
- Nabii Muusa firqawnal gacisak:usuk Qaranwaa kee baaxooy ken nammayih fanal taniimih Rabbi isin woh yasmite mara tekkeenik keenik iyye
- Firqawni isi derfal tan makaabanak:Muusa yol gacsam taabbeenih innaa? iyye
- Nabii Muusa keenik iyyeh:usuk sin Rabbiiy siinik naharsi abbobtih Rabbi kinni
- Firqawni isi marak diggah sin farmoytay sin fan rubsume usuk cabuli kinni iyye
- Nabii Muusa:usuk ayrò mawqaa kee ayrò kormaay, ken nammayih fanal taniimih Rabbi isin kas- kassoowa mara tekkeenik keenik iyye
- Firqawni Nabii Muusak yô kalah Yalla haysittek, diggah casbisen marih num koo abeyyo kaak iyye
- Nabii Muusa yi-numma tascasseemik baxxaqqa ittam (astooti kinnuk) koh baahennokuv? casbit yoo haytam kaak iyye
- Firqawni Nabii Muusak:numma yacee marih num tekkek tet baahey kaak iyye
- Tokkel Nabii Muusa isi caxxa qideeh, usuk (caxxa kinnuk) too waqdi baxxaqqa iyya baadeysa yekke
- Kaadu Nabii Muusa isi gaba isi kamiisik moyya kak culta ikkek culussu heeh edde luk hadiffi heeh, too waqdi is (gaba kinnuk) yable marat qidih ifak raqqa itte baras aalle kalah
- Firqawni isi derfal tan makaabanak, diggah tah (Nabii Muusa kinnuk) baab-li ixxiga-li iyye
- Usuk isi baabat sin baaxók sin yayyaaqem faxak, maca yoh tascasseeniih macal yoo amrissaanaah? keenik iyye
- Muusaa kee kay toobokoyta Haaruun caagid wadiroysaay, magaalooluk baab-aba koh gaabossa labha rub kaak iyye kay mari
- Ummaan baablih ixxigali koh baahaanamkeh
- Tokkel baababa timixxige ayrot yimixxige waktit kobxisimen
- Kaadu sinaamak gaaboowa iyyen
- Nanu baababa kattatnamkeh usun yayse mara yekkeenik iyyen
- Tokkel baababa temeete waqdi firqawnak:diggah nanu galto linoo? nanu Muusak yayse mara nekkek itte
- Firqawni: yeey; faxxa haytaanam galtòk liton, kaadu diggah isin too wagqdi yi-garil xayyoysime marat tanton keenik iyye
- Nabii Muusa baababak:isin qambissoonu waytaanam qambisa keenik iyye
- Tokkel baababa sinni akootaa kee sinni coox qambisseeh baabah sinaamat gexxa waarraa kee abeesas celsiiseeniih:firqawni nabnal xiibitna immay diggah nanu Muusak yayse mara akkenno iyyen
- Tokkel Nabii Muusa isi caxxa qambiseeh, eddeluk too waqdi usuk baadeysa yekkeeh, usun diraabah ginnaasiteenim (coox kee akoota kinnuk) inkih yunxuqe
- Tokkel baababa toh tuble waqdi Yallah Sujuuduh Radde
- Ginô Rabbil neemeneh axcuk
- Muusaa kee Haaruun Rabbil
- Firqawni:baababak anu idini siinih aceek naharat kaal teemeneenii iyye, diggah usuk (Muusa kinnuk) sin kaxxa kabiiriy baab sin barse kinni, toysa yi-digaalak siinil obtam sarrah aaxigetton, diggah sin gaboobiiy sin ibitte argiqeyyo migdi gabaa kee guri iba siinik argiqi hinnay guri gabaa kee migdi iba siinik argiqi akkeyyo, kaadu diggah inkih cooxut sin xinkiyeyyooh sin fanniseyyo keenik iyye
- Baababa: firqawnak atu net abta digaalá nee mabiyakta, diggah nanu ninni Rabbî fanah nandabbê kalah kaak itte
- Diggah nanu ni-Rabbi ni-dambitte neh cabam kaak qaagitna Muusal naharak teemene moominiin nekkeemih sabbatah
- Nabii Muusal:yi-naqoosak yeemene mara barat kuulus iyyaanamah wacyi kaal oobisne, diggah firqawnaa kee kay qande sin kataatele sin gacsaanamkeh axcuk
- Tokkel firqawni kay reedah gubaak tan magaaloolih qaskar ruube macaxu kaah kobxisaanamkeh israa-iil xaylok mawuq yoobbe waqdi
- Firqawni: diggah a-mari (israa-iil xaylo kinnuk) dago horta iyye
- Kaadu diggah usun kaxxam nee ceerissa taama aben
- Diggah nanu inkih cibbarsimaah, gulguluh keenih yan mara kinnino iyye
- Firqawnaa kee kay mara Masri baaxoy basaatin kee daroori-lek ken neyyeeqeh
- Kaadu kadnoonii kee meqe aroocaay meqe qarwak ken neyyeeqe
- Too mayyuq keenit kah abne innah, kaadu ken dabooqaa kee ken maalu israa-iil xaylo nagarsisne ken bayisneek gamadal
- Tokkel firqawnaa kee kay macaxi Nabii Muusaa kee kaâ luk yan mara ayro edde tawqe waktit kataaten
- Tokkel namma butta (firqawni maraa kee Muusâ mara kinnuk) sitta tuble waqdi, Nabii Muusâ kataysis:diggah nanu elel simneeh firqwnaa kee kay macxi nee qide-le iyyen
- Nabii Muusa keenik iyyeh: aleey, sin meeleelan, diggah anu yoo qokla Rabbi liyooh, edde naggoowa gita yoh ascasse-le
- Tokkel Nabii Muusal isi caxxat bad atuk iyyaanamah wacyi kaal oobisne, tokkel usuk kaa yootokeeh, bad baxsimeeh kulli exxa kaak kaxxa qaleh innah gacca itte
- Kaadu tokkel aka mara xayyosne (firqawnaa kee kay mara kinnuk) badat cullu iyyaanam fanah Muusaa kee Muusâ marih lakal
- Kaadu Nabii Muusaa kee kaâ luk yan mara inkih naggosneh
- Tohuk lakal aka mara badat xuumusne (firqawnaa kee kay macaxu kinnuk)
- Diggah tohut Yallih inkittinaanee kee kay dudda tascasse astá tan, kaadu keenik maggo mari yeemene mara makkinna
- Kaadu diggah ku-Rabbi, usuk maysoli xuwawli kinni
- Kaadu Nabiyow ama korosul Nabii Ibraahim xaagu maaqaay keenil akriy
- Usuk isi abbaa kee isi marak taqbudeenim maatiyaay iyye waqdi
- Numtinwwellitte naqbudeeh, tet amol daffeyak asna tet qibaadah iyyen
- Nabii Ibraahim isin ken kallactan waqdi, usun sin yaabbeenih innaa? keenik iyye
- Hinnay ken tuqbudeenik tu siinih xiqaanaa, hinnay ken aqbude wayteenik tu siinik kalaanaa keenik iyye
- Aleey!wohuk tu maabaanay, ni- abbobti nanu abnah innah taama neh abak sugteeh nanu wohul ken salleeh ken katatne iyyen
- Nabii Ibraahim keenik iyyeh:yoh warisay numtinwwellittek aqbudak sugteenim cubbiluk wagitteenii iggimaa kee makot taniinim sinnik taaxagoonuh
- Sin kee siinik naharsi abbobti
- Diggah usun yok qaduwwiiy ken maqbuda, kinnih immay anu aqbudem ginô Rabbi kinni, usuk addunyaa kee akeeral yok awlaytu
- Yallay tayse ginoh yoo gine usuk meqe gital tirri yoo hee-le
- Kaadu Kaa kinni yoo taskameeh, yoo tafqem
- Kaadu biyaakita waqdi biyaakak usuk yoo qaffoysa
- Kaadu Kaa kinni yoo qiddaah, sarra yoo taynuwweem Qhiyaamah ayró
- Kaadu Ķaa kinni yi-dambi yoh cabam kak qaagitam galtóh ayró (Qhiyaamah ayró kinnuk)
- Nabii Ibraahim isi Rabbi kallacak:yi-Rabbow tu-xiqta ixxiga yoh acuyaay, ku naqoosak meqe mara yoo eleelis iyye
- Kaadu meqe saareey, meqe xagar xagó (galab-xagó) yoh ab ellecabô maray yok lakal yamaatu waah addal Qhiyaamah ayrô fanah
- Kaadu ku-naqoosak naqiim deqsita Jannat nagra marat yoo hayis
- Kaadu yi-abbah dambi cab, diggah usuk makkoote marak numuk teynah sugek
- Kaadu yoo mawacarriysin ginó inkih magooqak cisab kee galtoh ugussa ayrò (Qhiyaamah ayro kinnuk)
- Woh gibdi ayróy maaluu kee xaylo tu edde xiqe wayta kinni
- Yallâ fanah saytun lubbi luk yemeete num akke waytek, koroosannuu kee munaafiqhinnuk
- Kaadu Yallak meesiteeh, kay taaqatal kaâ fanah yufkune marah Jannat xayyoysimaah ken yaybulleenih Qhiyaamah ayrò
- Kaadu jaciim deqsitta girá koroosite maray tirtô gitak makkoote yaybulleenih
- Kaadu ken sahitak:sin yallittey aqbudak sugteeni annih teetiiy? Keenik iyyan
- Yallak kalah aqbudak sugteenim Yallih digaalák sin cattaa hinnay is isi nafsi Yallih digaalák cattaa
- Tokkel ken (numtinwwellittee kee koros kinnuk) kee tirtô gitak makkoote mara xambabbaqqa ken heenih jahannamat foocah (neefih) qambisiman
- Kaadu ibliis qande (kaa kataate mara kinnuk) inkih teetit qambisimta
- Koros kee usun aqbudak sugeenim tet addal anuk keemaaritak ittak iyyaanah
- Yallal xiibitna immay nanu diggah addunyal baxxaqqa itta makoy qellu sinnih addat sugne itta koros
- Nanu Ginô Rabbit sin massosne waqdi Qibaadal
- Kaadu tirtô gitak nee makkossem matan umeyniitiy Yallak kalih im naqbudeemih neh secte akke waytek
- A-saaku shafaaqatta neh takkeeh, Yallih digaalak nee cattaamak num mannu
- Kaadu kacnoytah yan kataysay neh xuwaawa (allaaqala) mannu
- Maganey!inki adda addunyâ fanah madaara luk sugnaamal yeemene maray naggoowê loowot gacak nen iyyan
- Diggah too Nabii Ibraahim xaaguy taturet kaskassoowa marah astá tan, kaadu keenik ama xaagu yoobbe marak maggom yeemene mara makko
- Kaadu diggah Nabiyow ku-Rabbi usuk mayso-li xuwaw-li kinni
- Nabii Nuuc mari sinni farmoyta Nuuc dirabboyseeh, wohul farmoytit inkih dirabboyse mara yekken
- Ken toobokoyti Nabii Nuuc Yallak mameesittaanaa?keenik iyye waqdi
- Diggah anu siinih amaanat-le farmoyta kinniyo edde rubsumem sin gudduysaamal
- Toysa Yallak meesitaay yi-amri oggola
- Kaadu Yallih farmo sin gudduysaamal galtó sin messera, yi-galtó numul matanaay numul messera ginô Rabbil essera yoo akke waytek
- Toysa Yallak meesitaay yi-amri oggola
- Anninnal koo nummasnaah koo katatnaah sinaamak boola-le mari koo kataate way? Kaak iyyen kay mari
- Nabii Nuuc:usun abak sugen taamoomih ixxiga mayyu, cagalah anu ken kah seecam iimaanâ kalah keenik iyye
- Ken cisab kee galtò numul matan yi-Rabbiy qellittem yaaxigel tan tet akke waytek, woh aaxiginnitoonuy amah axcuk mananniton
- Kaadu anu yi-seecol yeemene mara xiiriya num hinniyo
- Anu abbay sinam xiiriya hinniyo, baxxaqqa iyya meesiisey Yallih digaalak sin meesiisa akke waytek
- Nuucow ama seecok aadeewaytek xeetit qiden marak numuk teyna akketto kaak iyyen
- Too waqdi Nabii Nuuc isi Rabbi seeceeh:yi-Rabbow diggah yi- mari yoo dirabboyseh iyye
- Toysa yi-Rabbow yoo kee ken fan meklah mekelaay Ni-fan baxisaay ken bayis, kaadu yoo kee moominiinik yô luk yan mara woo digaalak naggos iyye
- Tokkel kaa (Nabii Nuuc kinnuk) kee kaâ luk yan mara kibuk tan doynikil ken naggosne
- Tohuk lakal kay marak raaqe maray aaminewee maggo leet xuumusne Nabii Nuuc kee kaâ luk suge mara naggosneek gamadal
- Diggah too Nabii Nuuc xaaguy taturet kaskassoowa marah astá tan, kaadu keenik ama xaagu yoobbe marak maggo mari keenik yeemene mara makko
- Kaadu diggah Nabiyow ku-Rabbi usuk mayso-li xuwaw-li kinni
- Qaad deqgsitta kedo sinni farmoyta Huud dirabbosseeh, wohul farmoytit inkih dirabboyse mara yekken
- Ken toobokoyti Nabii Huud:Yallak mameesittaanaa? keenik iyye waqdi
- Diggah anu siinih amaanat-le farmoyta kinniyo edde rubsumem sin gudduysaamal
- Toysa Yallak meesitaay yi-amri oggola
- Kaadu Yallih farmo sin gudduysaamal galtó sin messera, yi-galtó numul matanaay numul messera ginô Rabbil essera yoo akke waytek iyye
- Ummaan aracay fayya iyyal fayya itta qarway dabqah elle gace waytaana digirih xissaanaa
- Kaadu maqar-le kalqoota haysittaanaa, addunyal waartaanaah, rabe waytoonu waytaanah innah? (mawaartan rabetton)
- Kaadu qidim kee hinnay digaaláh seehadaytu tabbixen waqdi xuwaw kee allaaqal sinni marih xibixih kaa tabbixen
- Toysa Yallak meesitaay yi-amri oggola
- Kaadu Yallay maggo afah tan niqmootay taaxigeeni siinih yeceek meesita
- Affara xiyyuu (gaalaay, laay, illii kee wadara) kee xaylo siinih yecee (lab-xayloo kee say-xaylo kinnuk)
- Kaadu basaatin kee weqta daroori siinih yecee
- Nabii Huud: diggah anu kaxxa ayroh (Qhiyaamah ayro kinnuk) digaalak siinih meesita koroosannuu kee Nabii dirabbossaanamak kate wayteenik keenik iyye
- Nel inki gide atu nee kassissam kee hinnay nee kassiisa marih num akke wataamah nanu inkinnah kol manaamina kaak iyye kay mari
- Ta nanu elle nanim kalah tu hinna nek naharsi marih diinii kee Qaadoodi akke waytek
- Kaadu nanu abnah naniimil madiggalsimna iyyen
- Usun Nabii Huud dirabboyseeniih ken finqisneh, diggah too finqay keenit abnet kaskassoowa marah astá tan, kaadu ama xaagu yoobbe marak maggo mari keenik yeemene mara makko
- Kaadu diggah ku-Rabbi usuk mayso-li xuwaw-li kinni
- Samuud deqsitta kedó sinni farmoyta Nabii Saalic dirabbosseeh, wohul farmoytit inkih dirabboyse mara yekken
- Ken toobokoyti Nabii Saalic Yallak mameesittaanaa?keenik iyye waqdi
- Diggah anu siinih amaanat-le farmoyta kinniyo edde rubsumem sin gudduysaamal
- Toysa Yallak meesitaay yi-amri oggola
- Kaadu Yallih farmo sin gudduysaamal galtó sin messera, yi-galtó numul matanaay numul messera ginô Rabbil essera yoo akke waytek
- Sin Rabbi addunyal saayah anuk niqmat addat waarak sin cabaa
- Basaatin kee weqta daroorih addal
- Kaadu buqreeraay, tamiiray (nakilay) tamri kak aleeh xabcinil meesite kal sin cabaa
- Kaadu qaleelak qarwa uruttan (orittan) urim teetik naggaarisak batritak dabqah elle gactoonuh
- Toysa Yallak meesitaay yi-amri oggola
- Kaadu umaanet caddok tature marih amri moggolina
- Uma taamat baaxo baysa maray maqaanet baaxo aymaaqewaah amri moggolina
- Samuud Nabii Saalicik :cagalah atu elle baaben marih num kinnito kaak iyyen
- Saalicow atu ninnah yan seehadaytu akke waytek kalah tu hinnitok, Nabii kinnitom kok tascasse astá baahey numma yacee marih num tekkek kaak iyyen
- Nabii Saalic keenik iyyeh : ah alaáy yi-asta kinni, is arakta ayrò leeh, isin wonnah timixxige ayroh araki liton
- Kaadu umaaneh tet maxagina, toysa kaxxa ayróh digaalá sin xagelek keenik iyye
- Tokkel arqó teetik kaleeniih tet qideenih, edde luk nadaamite marah maacisen digaala sinnil obtam yismiten waqdi
- Tokkel Nabii Saalic ken kak meesiise digaalá keenil obteeh finqgiteenih, diggah too finqay keenit abnet kaskassoowa marah astá tan, kaadu keenik ama xaagu yoobbe marak maggo mari keenik yeemene mara makko
- Kaadu diggah Nabiyow ku-Rabbi usuk mayso-li xuwaw-li kinni
- Nabii Luut mari sinni farmoyta Nabii Luut dirabboyseeh, wohul farmoytit inkih dirabboyse mara yekken
- Ken toobokoyti Nabii Luut Yallak mameesittaanaa ? keenik iyye waqdi
- Diggah anu siinih amaanat-le farmoyta kinniyo edde rubsumem sin gudduysaamal
- Toysa Yallak meesitaay yi-amri oggola
- Kaadu Yallih farmo sin gudduysaamal galtó sin messera, yi-galtó numul matanaay numul messera ginô Rabbil essera yoo akke waytek iyye
- Isin Labhal fidoh orobtaanaa raqqa itta ginok fanaak
- Kaadu sin Rabbi sin agabuy edde xaltoonuh siinih gine cabtaanaa? Wonna hinnay isin ama uma taamat (labhal orbaanam kinnuk) caddok tatra mara kinniton keenik iyye
- Nabii Luut mari:luutow labhal fidoh orobnaamak nee wassaamak kate waytek, diggaluk baaxok yeyyeqsimeeh xiiriyen marih num akketto kaak iyyen
- Nabii Luut keenil gacisak:diggah anu isin abtan uma taama kaxxa naqabuh niqba marih num kinniyo keenik iyye
- Nabii Luut isi Rabbi kallacak:yi- Rabbow yoo kee yi-buxah marak yol teemeneemiiy keenik kalah yol yeemene mara, yi-mari aba uma taamaa kee keenil obtu wayta digaalák nee naggos iyye
- Tokkel kaa kee kay buxah maraay kaal teemenem inkih naggosneh
- Idaltô daaqaynah umeynay (Nabii luut barra kinnuk) digaalát raaqe maray finqitê luk raqteeh finqitte akke waytek koroositteemih sabbatah
- Tohuk lakat aka mara (Nabii luut mara kinnuk) bayisneh
- Kaadu qaraanak xeet keenil oobisne digaaláh robti innah, tokkel Yallih farmoyti Nabii Luut meesiise maral robti innah obte digaalá manxu qaxumaah
- Diggah too Nabii Luut marat tekke digaalat kaskassoowa marah astá tan, kaadu keenik maggo mari yeemene mara makko
- Kaadu diggah Nabiyow ku-Rabbi usuk mayso-li xuwaw-li kinni
- Garbô mari sinni farmoyta Nabii Shuqeybi dirabboyseeh, wohul Yallih farmoytit inkih dirabboyse mara yekken
- Nabii Shuqeybi Yallak mameesittaanaa?keenik iyye waqdi
- Diggah anu siinih amaanat-le farmoyta kinniyo edde rubsume diini sin gudduysaamal
- Toysa Yallak meesitaay yi-amri oggola keenik iyye
- Kaadu Yallih farmo sin gudduysaamal galtó sin messera, yi-galtó numul matanaay numul messera ginô Rabbil essera yoo akke waytek
- Nabii Shuqeybi keenik iyyeh: sinaamah tu-elle keexxan keelá duudusaay, keexó daggoysa mara makkina
- Kaadu sinaamah massah yan miidaanay duddalel miidaanisa miidaanissaanam
- Kaadu sinaamak-le cakki madaggoysinaay, baaxó mabaysina baaxó umaanet baysa mara tikki itteenih
- Kaadu Yallay sin kee siinik naharsi ginoona gineh digaalák meesita
- Madyan mari Nabii Shuqeybik :cagalah atu elle baaben marih num kinnito kaak iyyen
- Kaadu Shuqeybow atu ninnah yan seehadaytu akke waytek kalah tu hinnitooy, diggah nanu dirableelak numuk teyna koo nakkale kaak iyyen
- Tokkel atu qaraanak digaalá kitiifoonuh nel oobis numma yacee marih num tekkek kaak iyyen
- Nabii Shuqeybi yi-Rabbi isin umaanek abba haytaanam yaaxigeh keenik iyye
- Tokkel kaa dirabboyseeniih, gayrantuy ken silaalisa-le ayróh digaalá ken tibbixeeh ken finqisse, diggah woh kaxxa ayróh digaalá kinni
- Diggah too Nabii Shuqeybi marat tekke digaalát kaskassoowa marah astá tan, kaadu keenik maggo mari yeemene mara makko
- Kaadu Nabii Mucammadow diggah ku-Rabbi usuk mayso-li xuwaw-li kinni
- Diggah A-Qhuraan ginô Rabbih xaquk obsime
- Jibriiliy amaanat-le kaa oobise
- Yallih farmoytittey Yallih digaalák sinam meesissak numuk teyna takkemkeh ku sorkocobbaxal kaa (Qhuraan kinnuk) oobise
- Qarab afay baxxaqqa-let kaa oobise
- Kaadu diggah ama Qhuraanih cusiyyi naharsi ambiyah kitoobah addal yan
- Kaadu ama makki koros atu Yallih farmoyta kinnitooh, Qhuraanay kol oobisne cakki kinnim, israa- iil xayloh qolama woh numma kinnim taaxigem astáh ken maxiqtaa
- Kaadu Qhuraan qarab akkewaa maray qajam deqsitak numuk teynal kaa oobisinnoy
- Tokkel usuk kaa keenil (makki koros kinnuk) akrayuk yeneeh, kaal yeemene mara akkuk manannon
- Tonnaah ama Qhuraanih cinaa kee angoddi umeyniitih yan marih sorkocobbaxittet culusneh
- Usun kaal (Qhuraan kinnuk) mayaaminan qansarissi ken hayta digaalá ubullu haanam fanah
- Eddeluk woo digaalá garcik (hurubbak) keenit tamaate, usun mamut teetik aaxige kalah
- Tokkel nanu natoobeeh, naamineh gide a-digaalák nee maay wadirroysan iyyan
- Usun Ni-digaaláh obtimii edde qataatakaanaah raksitaanam
- Nabiyow yoh warisey qumri keenik eyxerri hayneh maggo liggiditte ken sugusneeh hatkisnek
- Tohuk lakat kah xagnisimak sugen digaalá keenih temeetek
- Addunyal qumrii kee niqmatak edde hatkisimak sugeenim maca keenih xiqtaah? rabaanak naharal Yallal gace weenik (tu-keenih maxiqta)
- Kaadu hebeltô magaalah mara mafinqisinnino Yallih digaalák ken meesissah tan farmoytit keenih rubne nee akke waytek
- Keenih (makki koros kinnuk) kassiisiiy garci kalootu, kaadu Nanu keenit abneh nan digaalál daalimiin makkinnino
- Kaadu ama Qhuraan Nabiil sheetoona moobisinna, Jibriil oobisê kal
- Kaadu woh ken maceltaay keenih matakkaay maduudan
- Diggah usun (sheetoona kinnuk) qaraanak Qhuraan ankacsaanamak waasimeenimih sabbatah
- Toysa Nabiyow Yallâ luk aka Yalla maqbudin, toysa Yalli digaaleh yan marih num akkettok
- Kaadu Nabiyow ku-kedók kol xayih yan mara ni-digaalák meesis
- Kaadu Nabiyow moominiinik koo kataate marah Ramma ixxicaay, keenih xabbacow
- Tokkel Nabiyow ku-amri cineenik, toysa diggah anu isin abba haytaanamak bari kinniyo keenik ixxic
- Kaadu Nabiyow maysoleeh xuwawleh yan Rabbil kelitaay isi caagid kaal kelis
- Yallay barti salaatah dubuk soltaah abta waqdi koo yablel kelit
- Kaadu salaatah sujuud abaah, rukuuq aba marâ luk abta angoyyi kok Yable Rabbil kelit
- Diggah Yalli usuk yaabbi yaaxigi kinni
- Sinaamey siinih warsoo?keenik ixxic Nabiyow :sheetoona elle obta mara
- Usun elle oobaanam ummaan kaxxa dirablih dambi-li
- Sheetoona malaykak ankacissaah taabbem jinnilittel hakuyta, keenik maggo mari dirableelah anuk
- Gadaba makkotteeh, maxqawite mari ken kataata
- Nabiyow matablaa! usun diggah yabti daqooruk ummaan daqaaral diraabah giirisaanam ilqaa kee faylat caddok taturak
- Kaadu diggah usun abewayoonu waanam iyyan
- Yallal yeemeneeh meqe tamoomi abbaasiteeh Yalla maggom cuseeh yundullumeeniik gamadal Rasuul kee islaam diinik kalalak koros gadabal yab gacsa mara akke waytek. isi nafsii kee seehada yudlume mari aaxige-le kah gacoonu waan gacim kinni gacim rabaak lakal, diggah usuk uma gacim kinni